Татарстанда Covid-19 белән зарарлануның 23 яңа очрагы расланган

Татарстанда коронавирус инфекциясе йоктыруның 23 яңа очрагы расланган.Бу хакта ТР Президенты матбугат хезмәте җитәкчесе Лилия Галимова хәбәр итте, диелә "Татар-информ" мәгълүмат агентлыгында.

Чирләүчеләрнең дүртесе хастаханәгә салынган, 19ы өйдә дәвалана. Аларның тугызы Татарстанга Берләшкән Гарәп Әмирлекләреннән, Таиландтан, Төркиядән һәм Франциядән кайткан, ә 14е элегрәк зарарланган кешеләр белән якын элемтәдә торган.

18 очрак — Казанда, икесе — Чаллыда; Әлмәттә, Питрәчтә һәм Биектауда берәр очрак теркәлгән. Ике яңа авыручы 18 яшьтән кечерәк, җидесенә – 18 яшьтән алып 30 яшькә, бишесенә – 30дан 50гә, дүртесенә – 50дән 60ка, өчесенә – 60тан 70кә кадәр һәм ике кешегә 70тән 80яшькә кадәр. Моннан тыш, бүген Татарстан хастаханәләреннән коронавирустан дәваланган өч кеше чыгарылган.