Татарстанда ярты елда уртача хезмәт хакы 66,2 мең сумга кадәр арткан

Биредә тәкъдим ителә торган уртача хезмәт хакы илдәгегә караганда югарырак һәм ярты елда 66,2 мең сумга кадәр арткан. Төбәк хезмәт базарының төп трендлары журналистларга Казанда матбугат иртәнге ашында тәкъдим ителде, «Татар-информ».

«Тулаем Россиядә эшсезлек дәрәҗәсе хәзер тарихи минимумда 2,6 процент тәшкил итә, ә Татарстанда бу күрсәткеч тагын да түбәнрәк. Эш бирүчеләргә кирәкле вакытта вакансияләрне ябу, кирәкле хезмәткәрләрне табу шактый катлаулы. Эшсезлекнең мондый дәрәҗәсе төрле тармакларда һәм эшчәнлек өлкәләрендә эш бирүчеләр арасында шактый көчле конкуренция тудыра», — дип хәбәр итте «Авито Работы» төп клиентлары белән эшләү юнәлеше җитәкчесе Анна Осьмак.

Ике елда эш эзләүләр саны базарда якынча 40 процентка кимегән. Кешеләр махсус мәйданчыкларга сирәгрәк керә һәм эш бирүчеләрнең белдерүләренә җаваплар җибәрә. Эш бирүчеләр конкрет гамәлләр кылырга мәҗбүр.

«Алар эш эзләүчеләр өчен хезмәт шартларын яхшырта, социаль пакетны киңәйтә, матди булмаган һәм матди мотивация белән бәйле кызыклы шартлар тәкъдим итә. Шулай итеп, Татарстан буенча тәкъдим ителә торган хезмәт хакларының ярты елда 15 процентка артуы күзәтелә», — диде Анна Осьмак.

Эксперт тагын бер кызыклы трендны атады — югары конкуренция шартларында эш бирүчеләр наймның яшь һәм географик чикләрен киңәйтә. Аларның күбесе хәзер тәҗрибәсез яшь эзләүчеләрне яисә «45 плюс» категориясе аудиториясен теләп карый. Ә вакансияләр сайлаганда эш эзләүчеләр элеккечә хезмәт хакы күләменә, сыгылмалы графикка, рәсми эшкә урнашуга, эш бирүче турында яхшы бәяләмәләргә һәм яңа эш урынындагы шартларны һәм бурычларны җентекләп тасвирлауга игътибар итә.

Спикер хезмәт базарында иң кирәкле эшче һөнәрләрен билгеләп үтте. Топ-өчкә «җитештерү, чимал, авыл хуҗалыгы» һәм «төзелеш» һәм «транспорт, логистика» кебек өлкәләр керә. Россиядә тәкъдим ителә торган уртача хезмәт хакы хәзер 61,5 мең сум тәшкил итә, ә Татарстанда бу сан 4,7 мең сумга югарырак.

«Ни өчен барысы да безгә күченергә тели? Казан иң мотивацияле хезмәткәрләр рейтингында икенче ай рәттән беренче урынны алып тора икән. Шулай ук Татарстанда вакансияләрнең гомуми саны, узган ел белән чагыштырганда, 32 процентка артуы күзәтелә», — дип аңлатты «Авито Работы»ның Идел буе федераль округында төбәк вәкиле Наил Хафизов.

Хәзер республика эш бирүчеләре якынча 110 мең вакансия тәкъдим итә, шуларның 31 меңе — Казанда. Төбәк хезмәт базарының мөһим трендларының берсе — тиз яллау.

«Соңгы елда эш эзләүчеләрнең 60 процентка якыны бер ай дәвамында яки тагын да тизрәк эшкә урнашкан», — диде Хафизов.