Татарстанлылар вирусны күбесенчә эш урынында йоктыра

Татарстанда эш урынында Covid-19 белән авыру очраклары арткан. ТР буенча Роспотребнадзор идарәсе җитәкчесе урынбасары Любовь Авдонина шундый мәгьлүмат җиткерә. 
Урынбасар әйтүенчә, сентябрь аенда ешрак көнкүрештә вирус йоктырган булсалар (47%), октябрьдә исә эш коллективларында чирләү очраклары беренче урынга чыккан (57%). 
Статистикадагы мондый үзгәреш предприятие һәм оешма хезмәткәрләренең отпусклардан эш урынына чыгуы белән аңлатыла, ди Любовь Авдонина.
Җитәкче шулай ук короновирус инфекциясен булдырмас өчен, коллективларда барлык санитар чараларны үтәргә кирәклеген искә төшерде.