Татьяна Ларионова алабугалылар белән очрашты

Шәһәр администрациясендә гражданнарны кабул итү узды. РФ Дәүләт Думасы депутатына сораулар белән берничә алабугалы мөрәҗәгать итте.

Аларның берсе — күрү буенча 1 нче төркем инвалид, ул «Алабуга» махсус икътисади зонасында укучы һәм эшләүче 20 яшьлек улына телефон һәм компьютер сатып алуда ярдәм итүне сорап килде. Шулай ук күрмәүче алабугалы яңа һөнәр үзләштерү теләге турында да сөйләде. Ул психолог, экскурсовод булырга яки Алабуга мәдәният һәм сәнгать көллиятендә белгечлек алырга тели. Моның өчен аңа остаз (тьютор) кирәк булырга мөмкин.

Татьяна Ларионова алабугалының белем алу теләге булуын хуплады, шулай ук инде үзе акча эшли торган лаеклы ул тәрбияләвен дә билгеләп үтте. Социаль яклау бүлеге идарәсе башлыгы Светлана Прохорова «Демография» илкүләм проектының «Мәшгульлеккә ярдәм» федераль проекты кысаларында өстәмә һөнәри белем алу мөмкинлекләре турында сөйләде. Депутат Алабуга районы башкарма комитеты җитәкчесенең социаль үсеш буенча урынбасары Надир Курамшинга Надежда Ковшечникованың колледжда уку мөмкинлекләрен карарга кушты.

Тагын бер алабугалы кабул итүгә иренә матди ярдәм күрсәтүне сорап килде. Пенсионер җитәкче вазифасын биләгән, Алабуга шәһәр Советы депутаты булган. Ковидтан соң аның хәле начарлана. Хәзер аңа дәвалау өчен дарулар, шулай ук теш протезлары кирәк.

— Сезгә бик күп кыйммәтле дарулар кирәк, шулай булгач инвалидлыкны рәсмиләштерергә кирәк. Шул чакта бу мәсьәлә күпкә җиңелрәк, тизрәк, оперативрак һәм дәүләт ярдәме белән хәл ителәчәк. Инвалид группасы алганнан соң шәхси тернәкләнү программасы төзеләчәк, иптәшегезнең тормыш сыйфатын яхшырту өчен күп кенә өстәмә мөмкинлекләр барлыкка киләчәк, — дип аңлатты депутат.

Шулай ук картлык буенча иминият пенсиясе билгеләү турында да сорау яңгырады.

Татьяна Ларионова сүзләренчә, кабул итүдә шактый катлаулы сораулар күтәрелгән.

— Еш кына кешеләр дәүләт җаваплылыгы чаралары өлкәсенә карамаган үтенечләр белән мөрәҗәгать итә. Кабул итүгә өлкән яшьтәге хатын-кызлар килде, тормыш сыйфаты, керемнәр белән бәйле сорауларны күтәрделәр. Пенсия күләмен үзгәртү өлкәсендә сизелерлек ярдәм күрсәтүе авыр. Ләкин ни дә булса эшләп була икән, мин ярдәм итәчәкмен. Гаризаларны эшкә алдым, — дип билгеләп үтте депутат.