«Татмедиа» редакцияләре аккаунтларына язылучылар саны 34 процентка арткан

«Татмедиа» АҖ социаль челтәрләр өчен уникаль контент булдыра һәм бу эш алга таба дәвам ителәчәк. 

Быел холдингның барлык филиалларында СММ-белгечләр һәм веб-редакторлар барлыкка киләчәк. Алар үз ресурсларына язылучыларны җәлеп итү өчен уникаль контент булдыру өстендә эшләячәк.

«Татмедиа» АҖ генераль директоры Шамил Садыйков хәбәр иткәнчә, әлеге эшне алып бару өчен яңа бүлек булдырыла. 

2021 елда «Татмедиа» редакцияләре аккаунтларына язылучылар саны 34 процентка арткан. «ВКонтакте» ресурсы язылучылар саны буенча беренче урынны алып тора, әмма бу социаль челтәр укучыларны җәлеп итү буенча Инстаграмнан нык калыша. «Татмедиа» платформасы күрсәткечләре YouTube, TikTok һәм Telegram да арткан.