ТР Президенты йөкле хатын-кызларның якыннарын коронавирустан прививка ясатырга өндәде 

Татарстан Президенты Рөстәм Миңнеханов көмәнле хатын-кызлар арасында коронавирус белән авыручылар артуын әйтте. Президент сүзләренчә, йөкле хатын-кызның якыннары булачак әниләрне сакларга һәм вакцинация узарга тиеш.

«Бигрәк тә көмәнле хатын-кызларга игътибар бирергә кирәк. Алар да үзләрен сакларга тиеш. Табибка йөрүдән тыш, башка әйберләрне минимальләштерергә кирәк. Алар янәшәсендәге якын кешеләре вакцинация узарга тиеш», — диде Миңнеханов Татарстан Хөкүмәте Йортында узган киңәшмәдә.

Хәзерге этапта чир катлаулы уза, аннан соң да күп кеше ахырына кадәр тернәкләнеп бетә алмый.

Бүген Татарстанда 69 көмәнле хатын-кыз Covid-19 диагнозы белән хастаханәгә салынган. Табиблар аларның сәламәтлеге һәм баланың гомере өчен көрәшә.