XII "Кадрлар резервы«нда проектларны Татарстан Республикасының 18 районыннан яшьләр тәкъдим итәчәк

«Кадрлар резервы» проектының XII сезонында Татарстанның 18 районыннан 104 кеше катнашачак. Быелгы яңалык — команда эшенә басым ясау. Катнашучылар гомуми проектны булдыру өчен берләшәчәк һәм аны тормышка ашыру өчен акча алачак. 

«Кадрлар резервы» проекты 6 этаптан тора: өч көндезге һәм өч дистанцион. Көндезге этапта катнашучылар өчен мастер-класслар, тренинглар, питчинглар, хакатоннар һәм башкалар оештырыла. Дистанцион өлештә төрле чаралар, социаль акцияләр оештырылды.

Катнашучылар белән беренче очрашу Татарстан Милли китапханәсендә узды. Анда ТР Яшьләр эшләре буенча министрының беренче урынбасары Тимур Сөләйманов һәм Росмолодежь берләшмәсенең яшьләр проектлары һәм программалары идарәсе башлыгы урынбасары Татьяна Селиверстова катнашты. 

«Кадрлар резервы» проекты Татарстан Республикасы Президенты Рөстәм Миңнеханов һәм Татарстан Республикасы Яшьләр эшләре министрлыгы ярдәме белән «Татарстан Республикасы иҗади яшьләр академиясе» төбәк иҗтимагый оешмасы белән берлектә тормышка ашырыла. 11 ел эчендә проектта 12,5 меңнән артык кеше катнашты.