Алабугада атна эчендә 16 гаилә низагы чыккан

Узган атнада Алабугада 311 кеше административ җаваплылыкка тартылган. Бу турыда полиция бүлегендә хәбәр итәләр.

Гаилә низагы турында 16 хәбәр алынган, вак хулиганлык өчен 7 кеше тоткарланган. 5 кеше административ штрафны вакытында түләмәгән өчен җавап бирәчәк, 9 кешегә җәмәгать урыннарында спиртлы эчемлекләр кулланган өчен беркетмә төзелгән.

Моннан тыш, төнге вакытта гражданнар тынычлыгын бозган өчен 2 зат һәм балигъ булмаган баланы тәрбияләү буенча вазифаларын үтәмәгән өчен 8 ата-анага хокук алдында җавап бирергә туры киләчәк. 

263 машина йөртүче юл хәрәкәте кагыйдәләрен бозган өчен административ җаваплылыкка тартылган. Шуларның 8е машина белән исерек килеш идарә иткән.