Алабуга нуры

Алабугада Төркия гражданин талаганнар

7 гыйнвар көнне кичке сәгать унда Нечаев урамы, 11 нче йорт янәшәсендә билгесез кешеләр 27 яшьлек Төркия гражданинын кыйнап һәм талап китә.

Дуслары белән яшәгән Автомобилистлар урамыннан ерак булмаган кибеткә яшь төрек азык-төлек алырга дип керә. Иптәшләре исә "Эссен" кибетенә юнәлә.

Шампан шәрабы, сыра, тәмәке һәм азык-төлек алганнан соң егет Нечаев урамы, 11 нче йорт янәшәсеннән үзе яшәгән йортка таба юнәлә. Монда очраган егетләр аннан ниндидер кыз турында сораша башлый, әмма төрек кызны белмәвен һәм егетләргә ярдәм итә алмавын аңлата. Шуннан соң егетләр аннан телефон биреп торуын сорый. Төрек аларга телефонын бирә һәм хәтта телефон исәбендә акча булмавын да кисәтә.

Бу егетләр телефонны кире бирергә җыенганда гына тагын бер төркем яшьләр килеп чыга һәм телефонны тартып та ала. Төрек тә озак уйлап тормый: үзен кыерсытучыларны карга егып сала, сугышу башлана. Тик көчләр тигез булмый һәм Төркия гражданины аңын югалта. Аңга килгәннән соң ир документларын, акча янчыгын тапмый, продуктлар салынган пакет та юкка чыга. Күрәсең, җинаятьчеләр, ирнең чит ил кешесе булуын аңлап, тиз генә баемакчы булганнар.

Соңрак, Төркия гражданины полиция хезмәткәрләренә аңлатма биргәндә, үзенең "Иншаат" фирмасында эшләвен әйтә һәм җинаятьчеләрне сурәтли. Полиция хезмәткәрләре бу билгеләр буенча талаучыларны тиз арада кулга ала. Тикшерү барышында бу кешеләрнең Татарстанның төрле шәһәрләреннән килгән булуы һәм аларның "Алабуга" махсус икътисадый зонасында эшләүләре ачыклана. Алабугада алар арендага алган фатирда барысы бергә яши. Алар моңа кадәр дә хөкем ителгән булган.

Кеше малына кызыгучыларның бу гамәлләре РФ Җинаять кодексының 161 нче маддәсенең 2 нче өлеше буенча квалификацияләнә ("Сәламәтлек өчен куркыныч булмаган көч кулланып талау").

Алабуга эчке эшләр бүлеге инспекторы Любовь Бикмуллина әйтүенчә, соңгы арада махсус икътисадый зона үсеше белән бергә МИЗ заводларында эшләүче гражданнар арасында хокук бозуларның артуы да күзәтелә. Шуның белән бәйле рәвештә полиция хезмәткәрләре чит ил гражданнарына җәмәгать урыннарында ялгыз булмаска киңәш итә.

Р.Нуриева

Нравится
Поделиться:
Реклама
Комментарии (0)
  • 23 октября 2017 в 14:24
    Защити себя!
  • 12 января 2018 в 08:15
    2018 елда ничек яшәрбез
    Өметләр тулы яңа ел яңалыкларга да бай. Шул исәптән хокук өлкәсендә дә. Салым һәм пенсиягә кагылышлы законнар, ЮХИДИ норматив актлары үзгәреш кичерде, Хезмәт Кодексының, табигатьне саклау документларының кайбер маддәләре яңадан каралды.
    34
    0
    0