Ел башыннан Алабугада 281 кешенең исерек килеш машина йөртүе ачыкланган

Ел башыннан Алабуга районында алкоголь исереклеге билгеләре булган 281 шофер ачыкланган. Бу хакта җирле Дәүләт автоинспекциясендә хәбәр иттеләр. Ноябрьдә әлеге хокукны 21 шофер бозган.

Дәүләт автоинспекциясе юл хәрәкәтендә катнашучыларга автомобильнең куркыныч чыганагы булуын һәм аны идарә иткәндә юл хәрәкәте кагыйдәләрен төгәл үтәүне таләп итүен искәртә. Алкоголь продукциясен кулланган шофер транспорт чарасы руле артына утырырга тиеш түгел. Битараф булмаган гражданнарны тирә-юньдәгеләргә карата социаль җаваплылык күрсәтергә һәм исерек шоферлар турында хәбәр итәргә чакыралар.

Исегезгә төшерәбез, аек булмаган шофер турында аноним рәвештә @gibdd_elabuga_bot телеграм-боты ярдәмендә яки хокук саклау органнарына хәбәр итәргә мөмкин.