Алабугалыны «Беренче канал»да күрсәтәчәкләр

Аның герое — әлеге авылда гомер итүче Тамара Архипова. Ул үз хуҗалыгында кәҗәләр тота һәм аларны төрле командаларга — арткы аякларда йөрергә, алгы аягын бирергә һәм марш атларга өйрәтә.
Тамара Васильевна белән төрле басмалар һәм телеканаллар кызыксынган, ТР Авыл хуҗалыгы һәм азык-төлек министрлыгының матбугат хезмәте дә искәрмә түгел. Тамара Архипова турындагы яңалык «Беренче канал» редакциясенә дә барып җиткән. Мөхәррирләр аңа шалтыратып, аның турында сюжет төшерергә тәкъдим иткән. Әби өчен бу шалтырату көтелмәгән хәл булган.
— Миңа бөтен җирдән шалтыраталар. Массакүләм мәгълүмат чаралары вәкилләре генә түгел, минем танышларым да шалтырата. Кайберәүләр, минем турыда ишеткәч, хәтта минем кәҗәләрне сатып алырга телиләр, − дип сөйли Тамара Архипова.
Сәламәтлеге элеккечә нык булмаса да, кәҗәләрне ул аеруча игътибар белән карый.
— Безнең Алабуга Үзәк район хастаханәсендә табиблар бик яхшы. Авыруларым булуга карамастан, алар мине һәрвакыт аякка бастыра. Үзләренең игелекле карашлары, сүзләре белән дә дәвалыйлар, − ди ул рәхмәт сүзләре белән.
Аның яхшы мөнәсәбәте хайваннарга да кагыла. Тамара Архипованың сүзләренә караганда, ул аларны бик ярата, ә хайваннары аңа яратуга ярату белән җавап бирә, аны тыңлый, шуңа күрә командаларны да тиз өйрәнәләр. Хәзер ул Куян кушаматлы кәҗә балаларны йөртә алсын өчен, балалар чанасын ничек җайлаштыру турында уйлый.
— Андый чана миндә бар инде, хәзер аны беркетеп булсын өчен берәр камыт уйлап табарга кирәк. Күрәсезме, кәҗәмнең мөгезләре ничек зур, гадәти камыт монда туры килмәячәк, — дип сөйләде ул узган шимбәдә аның турында сюжет төшерүче «Беренче канал» операторына. Шулай ук ул үзе язган шигырьләрен дә укыды, алар аның берничә дәфтәрдә җыелган.
Телеоператор сүзләренчә, Алабуга районында яшәүче ханым турындагы сюжетны киләсе атнада ук «Доброе утро» телевизион программасында күрсәтергә тиешләр. Әлегә без барыбыз да сюжетның чыгуын көтеп калабыз.