Лениногорскидан Илдар Мостафин Татарстанның иң яхшы көллият студенты булды

Кичә, 27 октябрьдә, «Татарстан Республикасының ел казанышы-2019» премиясен тапшыру тантанасы узды. Истәлекле бүләк һәм дипломнарны яшь активистлар — Татарстанның фәнни, мәдәни, спорт юнәлешле колледж студентлары алды.
Конкурс җиңүчесе итеп Лениногорск шәһәренең музыка-сәнгать педагогик колледжы студенты Илдар Мостафин табылды. Җиңүчегә бүләкне ТРның яшьләр эшләре министры Дамир Фәттахов тапшырды.
Премияне оештыручыларның максаты — урта һөнәри белем бирү программасы буенча укучы сәләтле студентларны ачыклау, аларга ярдәм итү һәм кызыксындыру. 
Премия учредительләре: ТР яшьләр эшләре министрлыгы, ТР Фән һәм мәгариф министрлыгы, һөнәри белем бирү оешмаларының директорлар Советы, һөнәри белем бирү оешмаларының тәрбия эшләре буенча советы, һәм «Татарстан Республикасы студентлар Лигасы» региональ яшьләр оешмасы.