Татарстанда мәктәпкәчә яшьтәге балаларның әниләре бушлай укый ала

Алты яшькә кадәр баласы булган һәм беркая эшләмәүче әниләрне яңадан укыту оештырыла. Бу хакта “Татар-информ” мәгълүмат агентлыгы хәбәр итә.

“Быелдан яңалык кертелә. Хәзер декрет ялындагы хатын-кызлар гына түгел, алты яшькә кадәр баласы булган, беркая эшләмәүче, эш эзләп, мәшгульлек үзәкләренә мөрәҗәгать иткән аналар да яңадан берәр һөнәргә укытылачак”, – диде республиканың хезмәт, халыкны эш белән тәэмин итү һәм социаль яклау министры Эльмира Зарипова.

2020 елда Россиядә 40 мең хатын-кызны яңадан укыту ниятләнә. Татарстанда бу эшкә 87 миллион сумга якын акча бүлеп бирү планлаштырыла, 70 миллион сумы – федераль казнадан. 2020 һәм 2021 елларда 1,5 меңешәр ананы укыту ниятләнә.

Укулар “Демография” илкүләм проекты кысаларында уза. Милли проектлар Россиядә 2019 ел башыннан РФ Президенты йөкләмәсе буенча гамәлгә ашырыла.