Татарстанда соңгы тәүлектә 43 кешедә коронавирус инфекциясе ачыкланган

Татарстан Республикасында коронавирус инфекциясе белән зарарлануның 43 яңа очрагы ачыкланган. Бу хакта ТР буенча COVID-19га каршы көрәш штабы хәбәр итә. 
2 кеше хастаханәләргә озатылган, 41 кеше өйдә дәвалана. Авыручыларның төп яшь төркемнәре түбәндәгечә: 18 яшькә кадәр — 1, 18дән 30 яшькә кадәр — 8 очрак, 30дан 50 яшькә кадәр — 15 очрак, 50дән 60 яшькә кадәр — 11 очрак, 60тан 70 яшькә кадәр — 6 очрак, 70тән 80 яшькә кадәр 2 очрак ачыкланган.
Казанда — 23, Югары Осланда — 5, Яшел Үзәндә — 4, Яр Чаллыда 3 кешедә коронавирус инфекциясе теркәлгән. Әлмәт, Бөгелмә, Биектау, Кама Тамагы, Лаеш, Түбән Кама, Нурлат, Саба районнарында берәр очрак ачыкланган.
31 октябрьдә Татарстанда COVID-19 белән авыруның 8417 очрагы расланган. Эпидемия башланганнан бирле коронавирус инфекциясе йоктырган 7486 кеше савыккан, узган тәүлектә — 47 кеше.