Алабуга районының Поспелово авылында РФ Президентын сайлау көнендә Май чабу бәйрәме узды

Бүген Поспелово авылында яшәүчеләр өчен икеләтә бәйрәм: авылда Май чабу бәйрәме һәм РФ Президентын сайлаулар үтә. Иртән авыл халкы сайлау участогына юнәлде. Ә төшке ашка якынрак аларны күңелле Май чабу бәйрәме көтә иде.

Бәйрәм авыл мәдәният йортындагы сайлау участогы янында узды. Шуңа күрә әле тавыш бирергә өлгермәгәннәр башта тавыш бирделәр, ә аннары кайнар коймактан авыз итәргә ашыктылар.

Балалар өчен бәйрәмдә уеннар һәм күңел ачулар оештырылды, шуларның берсе — көянтә белән йөгерү иде.

— Искиткеч кояшлы көн, балаларга бәйрәм бик ошады, без дә канәгать. Күңел ачтык, биедек, — дип уртаклашты авылда яшәүче Надежда Григорьева.