Алабуга нуры

Алабуга районында булган фаҗиганең нечкәлекләре билгеле

Бу атнада чәршәмбе көнне Иске Юраш авылында фаҗига булды – җиде яшьлек малай елгада батып үлде.

Татарстан Республикасы буенча Россия ГТХМ Баш идарәсенең 15нче янгын сүндерү-коткару бүлегенең 75нче янгын сүндерү-коткару бүлеге башлыгы Евгений Шумилов сөйләвенчә, якынча мәгълүматлар буенча, 7 яшьтән 10 яшькә кадәр булган дүрт бала Юрашка елгасы янында була. Бу урында елганың киңлеге 10 метр, ә тирәнлеге 1,5 метрга җитә, агым шактый көчле. Малайларның берсе таягын төшереп җибәрә һәм, аны алырга омтылып, таеп яки тигезлеген югалтып егыла һәм шунда ук су астына китә. Бу вакытта елгада боз эреп беткән була. Янәшәдә ярдәм итә алырлык өлкәннәр булмый.
— Фаҗига якынча сәгать 16.00дән 17.00гә кадәр була. Өлкәннәргә бу мәгълүмат шунда ук барып җитми. Баланы өйдә таба алмагач, эзләүләр башлана. Малайлар бу хәл турында сөйләп бирәләр. 19 сәгать 31 минутта ПСЧ-75 элемтә пунктына мәгълүмат килеп ирешә, — дип сөйләде Евгений Шумилов.
Шунда ук 5нче зональ эзләү-коткару отряды коткаручылары, Алабуга янгын сүндерү һәм коткару гарнизонының оператив төркеме, 50 волонтер килеп җитә. Эзләү төнге сәгать бергә кадәр дәвам итә. Эшләрне иртәнге 5тә кабат башлыйлар, ә 6 сәгать 50 минутта баланың гәүдәсен торак пункттан 1,5 чакрым ераклыкта елга агымы буенча түбән өлештә табалар. Баланың гәүдәсен хокук сакчыларына тапшыралар. Тикшерү комитеты «Саксызлык аркасында үлемгә китерү» маддәсе буенча җинаять эше кузгаткан. Хәзерге вакытта бу хәлнең барлык сәбәпләре дә ачыклана.
Исегезгә төшерәбез, хәзер дә, җәйге вакытта да ата-аналар балаларын аеруча игътибар белән күзәтергә тиеш. Барлык елгаларда да боз кузгалмады, шунлыктан аның астына төшеп китү куркынычы бар. Язгы ташу чорында, хәтта аз гына бозда да, бәхетсезлек очраклары ешрак нәкъ менә балалар белән була. Сулыклар янында үз-үзеңне тоту кагыйдәләрен, су янында шаярырга ярамавын аңлатырга кирәк. Кулдан ясалган салларда, такталарда, бүрәнәләрдә яки йөзеп барган боз кисәкләрендә йөрү шулай ук катгый тыела. Моннан тыш, язгы ташу чорында түбәндәгеләрне эшләргә ярамый:

- сулыкларга чыгу;
- боз китү вакытында елга аша чыгу;
- текә һәм юылган ярларда басып тору — алар җимерелергә мөмкин;
- елганың яки теләсә кайсы сулыкның тирәнлеген үлчәргә, боз буйлап йөрергә.
Евгений Шумилов ассызыклаганча, хәзер балыкчылар да риск зонасында, җылы һава торышына карамастан, бозга чыгуларын дәвам итәләр.
Шуңа күрә, укучыларыбызның берәрсе бу категориягә керә икән, түбәндәге кагыйдәләрне истә калдырырга кирәк. Боз астына егылган очракта:
- паникага бирелмәгез;
- бөтен тән белән юка боз кисәгенә капланмаска кирәк, чөнки тән авырлыгы астында ул ватылачак;
- баш белән суга чуммас өчен, кулларны киң итеп колачлап җәяргә;
- терсәкләр белән бозга таяныгыз һәм тәнне горизонталь хәлгә китереп, боз өстенә аңа якын булган аякны куегыз, борылып, икенче аякны тартып чыгарыгыз һәм бозга тиз генә сикереп чыгыгыз;
- кискен хәрәкәтләр ясамыйча мөмкин кадәр куркыныч урыннан читкәрәк, кайсы юнәлештән килдегез, шунда таба ерып китегез;
- ярдәмгә чакырыгыз;
- үзеңне су өслегендә тотып торып, физик көчне мөмкин кадәр азрак сарыф итәргә тырышырга кирәк;
- йөзү вакытында башны мөмкин кадәр югарырак тотарга кирәк. Билгеле булганча, организмның җылылык югалту сәләтенең күп өлеше аңа туры килә;
- әгәр яр, сал яки шлюпканы узу 40 минуттан да артык вакыт таләп итмәсә, алар янына актив йөзеп килергә тырышыгыз;
- йөзү чарасына килеп җиткәч, кичекмәстән чишенергә, юеш киемнәрне сыгарга һәм кабат кияргә кирәк.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: