Алабугада шәхси йортта чыккан янгында ике бала һәлак булган

Бүген Алабугада коточкыч фаҗига: шәхси йортта чыккан янгында ике бала гомере өзелде. Вакыйга турында Татарстан Гадәттән тыш хәлләр министрлыгында сөйләделәр. 

Янгын күп балалы гаилә яшәгән шәхси йортта чыга. Фаҗига вакытында йортта 3 бала һәм аларның әтиләре була. Коткаручылар килгәнче, ир-ат 8 яшьлек улын коткарырга җитешә. Әтисе белән малайны хастаханәгә алып китәләр. 

Янгында 3 яшьлек малай һәм 12 яшьлек кыз һәлак була. Гадәттән тыш хәлләр министрлыгы хезмәткәрләре 67 кв. м. мәйданда ачык утны сүндерә. Вакыйга урынында 42 белгеч һәм 14 берәмлек техника эшли.

Тикшерүчеләр җинаять эше кузгаткан. 

Бу вакыйганың барлык шартларын ачыклауга юнәлдерелгән тикшерү эшләре алып барыла.