“Көлдергеч газлар” һәм имгәнгән җаннар

Әлеге психотроп матдә актив рәвештә рекламалана һәм яшьләргә тәкъдим ителә.

"Бәхет шарлары" - икенче төрле әйткәндә, азот закисе (шул ук "Ибица һавасы") үзенчәлекле тәме һәм баллы исле, төссез янмый торган газ.

Иң әүвәл бу газ медицинада ингаляция анестезиясе өчен, азык промышленностенда азыкны туңдырып саклау һәм автоспортта кулланылса, соңгы вакытта ул яшьләр кичәләрендә аеруча популярлашты. Газ кечкенә баллоннарда гади шарлар белән бергә яки турыдан-туры шарларга тутырып сатыла. Яшьләр шул шардан газ катнашмасын иснәп, акылдан яза: алар сәбәпсез шашкан кебек көлә башлый, үз-үзләрен тотышы кискен үзгәрә, баш әйләнә, баш авырта, һуштан язу күзәтелә, ишетү, тою-сизү сәләте кими. Бу рәвешле кәефләнүнең ахыры акыл саегу, үпкәләр шешенү, параличлану, гипоксия (кислород җитмәү) кебек чирләр бәйләме белән тәмамлана.

Һәрберебезнең балаларыбызны сау-сәламәт, бәхетле итеп күрәсе килә. Шуңа күрә мондый фактларга тап булганда, тиешле органнарга хәбәр салырга курыкмагыз. Сез моның белән күпләрне әлеге афәттән йолып, кайсындыр авыр чирдән коткарып, бәлагә юлыгудан алып кала алырсыз. Битараф булмагыз!

Игътибар!

Әгәр сез азот закисе куллану һәм тарату турында нинди дә булса мәгълүматка ия булсагыз, РФ Наркотикларны контрольдә тоту хезмәтенең ТР буенча идарәсенә (843) 273-43-45 ышаныч телефоны яки Алабуга районара бүлегенең 8(85557) 3-97-70 ышаныч телефонына хәбәр итегез.

Алия Сираева