Шишкин буаларында 20 яшьлек алабугалы батып үлгән

Кичә кич Алабугада фаҗига булган. Шишкин буаларында 20 яшьлек егет батып үлгән. Бәхетсезлек очрагы буаларның икенчесендә булган. Бу хакта Россия гадәттән тыш хәлләр министрлыгының Татарстан буенча Баш идарәсе матбугат хезмәте хәбәр итә. 

Дежурный пультына хәбәр 17.38 сәгатьтә килә. Фаҗига урынына ПСО-5 коткару төркеме килеп җитә. Яшь кешенең гәүдәсен 21.09 сәгатьтә 3 метр тирәнлектән күтәрәләр. Шунысын да билгеләп үтәргә кирәк, урын коену өчен җиһазландырылмаган. Буалар янында су коену тыелганлыгы турында аншлаглар эленеп тора.

Коткаручылар махсус билгеләнгән урыннарда гына коенырга киңәш итә. Суда үз-үзеңне тоту кагыйдәләрен һәм куркынычсызлык чараларын үтәүгә карата булган тискәре караш еш кына бәхетсезлек очракларына, кешеләрнең үлеменә китерергә мөмкин.

Фото: ГУ МЧС России по РТ