Алабугада XVI Спас ярминкәсе ачылды

Бүген Алабугада XVI Спас ярминкәсе ачылды. Быел ул «Яшьләр» стадионы һәм Ленин мәйданында үткәрелә. 

Быел ярминкәдә Россиянең 63 торак пунктыннан 362 декоратив-кулланма сәнгать остасы, 820 ваклап сату вәкиле, 30га якын җәмәгать туклануы вәкиле, 35 аттракцион, 30дан артык чәчәк сатучы катнаша. Гомумән алганда, 2700дән артык сәүдә урыны бар. Катнашучыларның географиясе киң: алар Россиянең, Белоруссиянең, Кыргызстанның, Көньяк Осетиянең һәм Казахстанның 170 торак пунктыннан килгәннәр.

Ленин мәйданында төрле әйберләр белән сату итүче осталар урнашкан. Биредә бизәнү әйберләре, милли костюмнар, пыяла, мамык, йон, трикотаж һәм күн әйберләр, керамика, гжель, хохлома, чүкеп ясалган һәм гравировкаланган әйберләр, металлдан эшләнмәләр, сәнгать тукымасы, курчаклар һәм башка күп нәрсәләр күрергә һәм сатып алырга мөмкин. 

Моннан тыш, авыл хуҗалыгы предприятиеләре, фермер хуҗалыклары продукциясе, төрле җитештерүчеләрдән деликатеслар бар.

Тантаналы ачылыш алдыннан Алабуга районы башлыгы һәм чара кунаклары осталарның эшләнмәләре тәкъдим ителгән рәтләр буйлап йөрде.

Ачу тантанасы театрлаштырылган тамашадан башланды.

Район башлыгы Рөстәм Нуриев, алдагы елларда район белән идарә иткән җитәкчеләргә Спас ярминкәсен яңадан торгызулары, республика җитәкчелеге һәм ярминкәгә елдан-ел килүче осталарга ярдәм иткәннәре өчен рәхмәт сүзләрен җиткерде.

Шулай ук Спас ярминкәсен тантаналы ачу кысаларында безнең район һәм Белоруссиянең Молодечненск районы арасында туганлык турында килешүгә кул куелды.

Ярминкә кунакларны өч көн дәвам итәчәк. Иртәгә ярминкәдә беренче тапкыр рыцарьлар сугышын реконструкцияләү тәкъдим ителә.