Ислам дине нигезләрен – кече яшьтән

Үсеп килүче яшь буыныбызга дини тәрбия бирү мәсьәләсе бүгенге көндә иң мөһим урын алып тора. Әхлакый тәрбия бирү һәм ислам дине турындагы белемнәрен киңәйтү максатыннан, балалар өчен Ислам дине нигезләре буенча дәресләр оештырыла да инде.
Кайберәүләр мондый эшчәнлекне ничектер берьяклы, бәлки, ялыктыргыч итеп тә күз алдына китерәдер, әмма балаларга белем бирүчеләр белән аралашканнан соң, моның алай түгел икәнлегенә инанасың. Дөм-Дөм авылында Ислам дине нигезләрен Рәхилә Шәкерт кызы Әмирханова белән Ләлә Әнәс кызы Галиева укыта.
— Алабуга шәһәре һәм районы имам-мөхтәсибе Хәлим хәзрәт Шәмсетдинов укучылары без. Бик зур рәхмәт аңа, ике ел атна саен мәчеткә килеп безне укытып йөрде, ул вакытта 15ләп кеше белем алды, — дип сүзен башлады Ләлә ханым.
Авылларда яшьләр саны елдан-елдан ел кими. Балалар аз булу сәбәпле, дәресләргә дә йөрүчеләр күп түгел. Әмма иң мөһиме — балалар бирегә бик теләп йөри.

— Дәресләр атнага бер тапкыр үтә. Былтыр гарәп графикасын өйрәттек, быел укый башлыйбыз, Аллаһы боерса. Дәресләр тәмамлангач, бергәләп чәй эчәбез. Шул мөмкинлектән файдаланып, табын әдәпләрен искә төшереп торабыз. Ашар алдыннан ни дияргә, ашап бетергәч нинди дога укып, торып китәргә. Дини бәйрәмнәр оештырабыз, төрле чараларда катнашабыз. Әйтик, балалар белән бергә Җәмигъ мәчетендә узган Коръән уку бәйгесендә катнаштык. Әле шушы көннәрдә генә Мәүлид бәйрәме оештырдык, Пәйгамбәребез Мөхәммәд (с.г.в.)нең тормыш юлын искә алдык, салаватлар әйттек.

Төрле догаларны, гарәп хәрефләрен, ислам нигезләрен өйрәнүдән тыш, балалар хәрәкәтле уеннарда, бәйгеләрдә көч сынаша һәм өмәләрдә катнаша. 

— Кышын балалар белән бергәләп чаңгы шуарга чыгабыз. Язын һәм көзен өмәләрдә катнашабыз, мәчет бакчасына чәчәкләр, агачлар утыртуда да үз өлешебезне кертәбез. Узган елны кышкы каникулда мәчет ишегалдында авылга кунакка кайткан балалар белән берлектә «Күңелле стартлар» оештырдык, аннан соң мәчеткә кереп әхлак темасына фикер алыштык, чәй эчтек. Барысын да оештырырга мәчеткә йөрүче апалар ярдәм итә, рәхмәт аларга, — ди Ләлә ханым.
Фотолар Ләлә Галиеваның шәхси архивыннан.