"Җәмигъ" мәчетендә Корбан бәйрәме (фоторепортаж)

автор, 26 октябрь 2012 - 05:13

1178

Корбан гаете чаралары иртәнге сәгатьләрдә үк шәһәрнең һәр мәчетендә иртәнге намаз һәм вәгазь белән башланды. Алабугада иң зур чара, һәр елдагыча, "Җәмигъ" мәчетендә үтте. Анда 500дән артык кеше килгән иде.

Мәчет эченә сыймаган мөселманнар урамда торып гыйбадәт кылды.

Иртән беренче яуган кар да сөендерде.

Мәчеткә җыелучылар алдында Ислам хәзрәт бәйрәм вәгазен сөйләде. Вәгазьне хәзрәт татар һәм урыс телендә укыды. Вәгазенең азагында Ислам хәзрәт мөселманнарга иминлек, саулык теләде.

Бәйрәм вәгазеннән соң, "Җәмигъ" мәчетенә җыелучылар бергәләп гает намазын укыды. Гает намазын имам-хатыйб Азат хәзрәт Шәрипов укыды.

Аннан соң мөэмин-мөселманнар хәерләр өләште һәм мәчет ишегалдына чыкты. Анда берничә машинада Алабуга районы фермер-хуҗалыкларыннан корбанлык сарыклар китерелгән иде (бәясе хайванның авырлыгына карап 3 мең сумнан алып 8 меңгә кадәр). Биредә йөздән артык сарык корбан ителде.