Елена Голованова: үз гаиләсенә гашыйк кеше
Алабуганың Мәдәният сарае директоры Гашыйклар көне алдыннан, зур гаиләдә булган мәхәббәт һәм дуслыкның аңа "Ел хатын-кызы" булырга ярдәм итүен сөйләде.
Әйтергә кирәк, Головановларның нык гаилә союзына тиздән 14 ел тула. Бу озын юл башында бәхет өчен аларга бар да җитәрлек: өч чибәр кызлары һәм бер уллары - Елена һәм Александрның төп байлыгы.
- Ирем - минем төп таянычым, - ди Елена. - Тормышыбызда ул миңа һәрвакыт көч биреп торды, миңа 22 яшь чагында ук безнең өч балабыз бар иде бит!
Бәхетле хатын һәм ана сүзләренә караганда, төпчек улларын алар 11 ел көткәннәр. Язмыш аларга шундый зур бүләк ясый: кечкенәләре Ваня, туйларының чираттагы еллыгына туа. Барысы да әкияттәгечә, шулаймы? Кызларына да әкияттәгедәй гүзәл, патша кызлары исемнәрен бирәләр - Анастасия, Мария, Екатерина.
Хәзер Александр һәм Еленаның кызлары бию, музыка, рәсем белән шөгыльләнә, сәнгатьле сөйләм телен үстерәләр, өч яшьлек Ваня да үсеп килә һәм инде лидерлык сыйфатларын күрсәтә дә башлаган, ә бәхетле әти-әниләренең инануынча, бу байлык - бәһасез.
Күптән түгел генә Головановлар гаиләсе Мамадышта үткән "Ел хатын-кызы. Ел ир-аты: хатын-кызлар карашы" республика конкурсының зона турында "Хатын-кыз - ана" номинациясендә җиңүче булды. Гаиләнең чыгышка әзерләнүен Елена елмаеп искә ала.
- Бу конкурс гаиләне тагын да берләштерде, - ди ул, - сәхнәдә менә шулай алтау бергә, кулга-кул тотынышып торганда, һәрбереңнең дулкынлануын тою, шул ук вакытта бер-береңнең ышанычын акларга теләү - бу бик зур кыйммәт.
Чара вакытында жюрины Головановлар гаиләсенең патша һәм патшабикә, патша кызлары һәм патша улы костюмнары, чыгышлары соңындагы яктырткыч шоу, бу искиткеч кешеләрнең елмаюы гына түгел, ә үз гаиләсенә гашыйк Еленаның конкурс "визитка"сындагы: "Алар минем дүртәү - бу могҗиза! Беркайчан да болай бәхетле булырмын дип уйламаган идем!"- диюе дә шаккатырды.
Динә САБИТОВА
