Махсус хәрби операциядә катнашучыларга социаль ярдәм чаралары турында аңлаттылар

Россия Социаль фондының Татарстан Республикасы буенча бүлеге махсус хәрби операциядә катнашучыларга һәм аларның гаилә әгъзаларына социаль ярдәм чаралары тәкъдим итә.

Шундыйларның берсе — мобилизацияләнгән хәрби хезмәткәрләрнең балаларына 15548 сум күләмендә айлык түләү.

Түләү бала туган көннән билгеләнә, әмма әтисе хәрби хезмәтне башлаган көннән дә иртәрәк түгел. Акча балага өч яшь тулганчы түләнә (әтисе ул вакытка кадәр хезмәт иткән очракта).

Шулай ук мобилизацияләнүченең йөкле хатынына (йөклелек вакыты 180 көннән дә ким булмаса) 36278 сум күләмендә бер тапкыр бирелә торган түләү билгеләү күздә тотыла.

Мобилизацияләнүчеләрнең һәм хәрби хезмәткәрләрнең гаиләләренә ярдәм итүнең тагын бер чарасы — МХО катнашучыларының гаиләләренә ташламалы шартларда билгеләнә торган бердәм пособие. Хәрби хезмәткә чакырылган хезмәткәрнең барлык элеккеге кереме — хезмәт хакы, премияләр, эшмәкәрлек кереме, түләү исәпләгәндә хисапка алынмый.

Шулай ук мобилизацияләнгән гражданнарга нуль керем кагыйдәсе кагылмый: әгәр ирнең объектив сәбәпләрсез хезмәт хакы булмаса, ә гаилә мохтаҗ дип танылса, пособие билгеләнәчәк; элегрәк гаилә иренең кереме булмау сәбәпле пособие ала алмаган булса, түләүне билгеләү өчен Россия Социаль фонды бүлегенә кабат мөрәҗәгать итә ала.

Исегезгә төшерәбез, мобилизация буенча хәрби хезмәткә чакыру фактын раслаучы документлар гариза бирүче тарафыннан мөстәкыйль рәвештә тапшырыла. Пособие 6 айга билгеләнә. Бу срок тәмамлангач, гаилә кабат гариза бирә ала.

Моннан тыш, хәрби травма нәтиҗәсендә инвалид дип танылган гражданнарга 1000 сум күләмендә өстәмә айлык матди тәэмин итү тиешле.

Хәрби хезмәткә чакыру буенча хәрби хезмәт бурычларын үтәгәндә һәлак булган яки хәрби хезмәттән азат ителгәннән соң хәрби травма нәтиҗәсендә вафат булган хәрбиләрнең балаларына ай саен 2815 сум күләмендә пособие билгеләнә.

Сугыш хәрәкәтләре ветеранына ай саен 3896 сум күләмендә акчалата түләү билгеләнә, ә һәлак булган ветеранның гаилә әгъзаларына ай саен 2125 сум күләмендә түләү исәпләнә ала. Бу ярдәм чарасын алу өчен сугыш хәрәкәтләре ветеранының таныклыгы кирәк булачак.

Хәрби хезмәт вакытында һәлак булган хәрбиләрнең тол хатыннары торак биналар өчен түләү чыгымнары белән бәйле рәвештә компенсация түләүләре алу хокукына ия. Түләү күләме айлык коммуналь хезмәтләр чыгымнарының (шул исәптән стационар шәһәр телефонын урнаштыру чыгымнары) 60 процентын тәшкил итә.

Хәрби хезмәт вакытында һәлак булган хәрбиләрнең гаилә әгъзаларына шәхси торак йортларны ремонтлауга акча билгеләнә ала.

Бу түләүләрне Дәүләт хезмәтләре порталы аша яки шәхсән килеп социаль фондның клиентлар хезмәтендә, күп функцияле үзәктә рәсмиләштерергә мөмкин.

Социаль ярдәм чараларын билгеләү мәсьәләләре буенча консультацияне 8-800-1-00000-1 телефоны аша алырга була (шалтырату бушлай).