Иске Яңа ел да үтте

Сәхнәдә күп санлы әкият персонажлары бәйрәмгә җыелган кунакларны, аеруча балаларны төрле уеннарга, конкурс һәм викторинага җәлеп итте. Барысыннан да бигрәк, Убырлы карчыкларның күплеге күзгә ташланды. Ә атаманнары - баш убырлы бәлагә тарыган, җитмәсә үзенең туган көнендә гашыйк булган. Кемгә? Менә анысы табышмак. Убырлылар барысы бергә җыелып аның кемгә гашыйк булуын гоманлый: Иван Царевич аның өчен бик яшь, Кощей аның зәвыгына туры килми, ә менә Жириновский шәп кандидат та, әмма өйләнгән...

Үзләренең башлыкларын тынычландыру максатыннан убырлы карчыклар аңа итек бүләк итте һәм җырлар җырлады. Сәхнәдә әкият персонажлары бер-берсен алыштырып кына торды. Чегән кызы һәммә кешегә шаян такмаклар әйтеп, аларның киләчәген юрады. Алабуга артистлары күңелле җырлары, ритмлы биюләре белән кич буе тамашачының күңелен күрде. Ә конкурслар, викториналар, кулдан төрле әйберләр ясау, бию осталыгына бәйгеләр - беркемне дә битараф калдырмады.

Халык әлләни күп булмаса да, бәйрәм, әйтергә кирәк, күңелләргә хуш килде.

Наилә Баязитова