Алабуга суды телефон карагын хөкем итте

Алабуга шәһәр суды тарафыннан исерек хәлдә башка кешенең телефонын алган һәм кире кайтармаган ир-атка карата җинаять эше каралды. Соңрак ул аппаратны йорт янындагы тукталышта билгесез ир-атка сата.

Телефон хуҗасына китерелгән зыян суммасы 5 211 сум дип бәяләнә. Чит кешенең милкен үзләштергән ир-ат РФ ҖК 158 маддәсенең 1 өлешендә каралган җинаять кылуда гаепле дип танылган, аңа 6 айга ирегеннән мәхрүм итү рәвешендә җәза билгеләнгән.

РФ ҖК 69 маддәсенең 5 өлешенә ярашлы рәвештә, әлеге хөкем буенча билгеләнгән җәзаны Белгород өлкәсе Грайворонск район суды карары буенча билгеләнгән җәза белән өлешчә кушу нәтиҗәсендә, закон бозучы 10 айга колония-поселениегә җибәрелә. Шулай ук ул 4 елга транспорт чаралары белән идарә итү хокукыннан мәхрүм ителә.