Алабугада 2024 елга 217 ишегалды ремонтланачак

Исегезгә төшерәбез, программа республикада 2020 елдан гамәлгә ашырыла. Аның эш нәтиҗәләре шәһәр планеркасында район башкарма комитеты җитәкчесенең инфраструктура үсеше буенча урынбасары Андрей Томилин тарафыннан игълан ителде. Аның сүзләренә караганда, 4 ел эчендә республика тарафыннан ишегалларын төзекләндерүгә бүлеп бирелгән акчалар 804,1 миллион сум тәшкил иткән.

2020 елда 132,4 миллион сумга 34 ишегалды, 2021 елда — 168,5 миллион сумга — 31, 2022 елда 270 миллион сумга 54 ишегалды төзекләндерелгән.
Быел, программаны гамәлгә ашыруның соңгы елында, 55 ишегалды территориясен тәртипкә китерү планлаштырыла.

«Безнең ишегалды» программасы ярдәмендә 2023 елда 43,1 мең квадрат метр юлларда ремонт эшләре үткәрелде һәм 173 яктырту баганасы куелды.
Хәзерге вакытта балалар мәйданчыкларында 9 яңа уен комплексы, 100дән артык таган һәм карусель, 9 комлык һәм балалар өчен 40тан артык башка җиһазлар бар.

Спортны үстерү максатларында 43 ишегалдында 11 спорт комплексы һәм 21дән артык спорт җиһазы һәм тренажерлар барлыкка килде.

Шулай ук эскәмияләр урнаштырылган, каты коммуналь калдыклар өчен чүп савытлары куелган — барлыгы 45 элемент.

33 ишегалдында агачлар утыртылган.

Шунысын да билгеләп үтәргә кирәк, Алабугада җылылык челтәрләре предприятиеләре тарафыннан ишегалларында 440 метр кайнар су белән тәэмин итү һәм җылыту челтәрләре алыштырылды, бу эшләргә якынча 2 миллион сум акча тотылды. Махсус икътисади зона акчасына (5 миллион сумнан артык) 1,4 километр салкын су белән тәэмин итү һәм ташландык суларны агызу челтәрләре яңартылды.

«Безнең ишегалды» программасы алабугалыларның фикерен исәпкә алып гамәлгә ашырыла.

— Без торак милекчеләренең гомуми җыелышын үткәрәбез һәм шуннан соң гына булачак ишегаллары схемасын килештерүгә җибәрәбез, — дип билгеләп үтте Андрей Томилин.

Программа ярдәмендә үзенчәлекле традиция дә барлыкка килде — ел саен үткәрелә торган «Ишегалды бәйрәме», быел ул 8 мәйданчыкта узды.

— Әлеге программаны тормышка ашыруның нәтиҗәсе булып халыкның лояльлеге күрсәткече хезмәт итә, ул Алабуга районы буенча 99,6 процент тәшкил итте, — дип нәтиҗә ясады Андрей Томилин.