Алабуганың 4нче микрорайонында юл өстендәге җылылык челтәрләрен сүтүне тәмамладылар

Алабуга җылылык челтәрләре хезмәткәрләре бу атнада Хирург Нечаев урамындагы 16 «а» йорт яныннан үтә торган магистральнең соңгы өлешен алдылар. Аның кирәге калмады, чөнки быел җәй көне үк әлеге йортны 4/5 микрорайоны челтәренә кушып куйдылар. 

Иске торбалар урынына җир астына заманчаларын урнаштырдылар. Алар җылылыкны яхшырак саклый, дымнан курыкмый, физик тәэсирләргә чыдамрак. Шулай ук аларның эш вакыты да озынрак − 30-40 ел. 

Шәһәрне төзекләндерү буенча зур эш алып барыла, советлар заманындагы кебек юл өстеннән узып торган торбалар алына, заманча торбаларны җир астыннан салалар. Барлыгы 600 метр озынлыкта торбаүткәргечләр сүтелгән һәм яңа корылганнарының озынлыгы 200 метр булган. Башкарылган эшләргә киткән акча күләме — 3,9 миллион сум.