Алабуга дәүләт автоинспекторлары яраланган ир-атны коткарган

Алабуга юл-патруль хезмәте хезмәткәрләре, полиция капитаны Илназ Ситдыйков һәм полиция лейтенанты Азат Сафинга постта торганда ике кеше мөрәҗәгать итә. Ачыкланганча, берсенең кулы яраланган була. Бу вакыйга турында җирле ЮХИДИ бүлегендә сөйләделәр.

32 яшьлек алабугалы эш вакытында кулын болгарка белән яралый. Ярасы җитди булганлыктан, аңа ашыгыч рәвештә ярдәм таләп ителә. Инспекторлар зыян күрүчене шунда ук патруль машинасына утыртып, үзәк хастаханәгә алып киләләр. 

Дәүләт автоинспекциясе хезмәткәрләренең оператив гамәлләре нәтиҗәсендә, табиблар пациентка вакытында медицина ярдәме күрсәтә һәм хәзер аның тормышына бернинди дә куркыныч янамый.