Алабуга районында яшәүче гаилә МХОга автомобиль тапшырды

Бу атнада Алабуга районыннан махсус хәрби операция уздыру зонасына «Нива» автомобиле тапшырылды.

Лекарево авыл җирлеге башлыгы Ирина Гарипова ире Рөстәм Мөбарәкшин белән бергә махсус операция сугышчыларына үзләренең машиналарын бирергә булганнар.

− Без кешеләрнең МХО сугышчыларына машиналар тапшыруларын, бу «Нива»ларның фронтта ничек ярдәм итүләрен күрдек. Без дә шундук үз машинабызны фронтка тапшырырга булдык. Ул безгә хезмәт итте, хәзер хәрби хезмәткәрләргә ярдәм итсен. Җиңүне якынайтуга шулай итеп өлеш кертергә телибез. Егетләр өчен җан атабыз, алар барысы да безнеке, барысы өчен дә бик борчылабыз, — ди Ирина Гарипова.

Автомобильне алырга «Виват, шурави» хәрби-патриотик коллективының сәнгать җитәкчесе Рамил Дәүләтшин килде. Гуманитар йөкләрне китерү белән ул 2022 елдан бирле шөгыльләнә, аның исәбендә МХО зонасына 20дән артык сәфәр. Тапшырылган автомобиль әзер булуга, аны Татарстанның 1232 нче полкына тапшырачаклар.

− Бу машина билгеләнеше буенча кулланылачак, ул хәрби хәрәкәтләр зонасына десант белән керәчәк, ягъни безнең солдатларның керүенә һәм башка солдатларның ротациясенә эшләячәк — солдатларны алып, тылга китәчәк. Бу аның төп бурычы. МХОда машиналар тиз сафтан чыга, квадрокоптерлар күп, гадәттә машиналар 3-4 куллануга җитә. Шуңа күрә МХО зонасында егетләргә автомобильләр кирәк, — дип аңлатты Рамил Дәүләтшин.

Бу юлы Татарстанның 1232 нче полкына Алабуга, Менделеевск һәм Кукмара районыннан уртак йөк тапшырылачак, бу — ике «Нива», «УАЗ»ик һәм тәгәрмәчле мунча.

Рамил Дәүләтшин билгеләп үткәнчә, хәрбиләргә теләсә нинди ярдәм мөһим:

− Барлык солдатлар исеменнән ярдәм өчен зур рәхмәт белдерәм. Без бергә булганда, безне җиңмәячәкләр!