Алабугада кичә Укытучыларның август конференциясе узды

Район педсоветы 9нчы мәктәпнең яңартылган бинасында, актлар залында булды. Быел бу мәктәпне төзекләндерүгә республика бюджетыннан 30 миллион сумнан артык акча китте һәм 10 миллион сумнан артыгын муниципалитет бүлеп бирде. Шулар хисабына бинаның фасады, фойе һәм ашханә яңартылды.

Чара алдыннан кунаклар күргәзмә карап йөрде, анда шәһәр һәм район мәгариф учреждениеләре үз казанышларын һәм эшләрен тәкъдим итте. 
Шуннан соң район башлыгы Рөстәм Нуриев «Мәктәпкә җыенырга ярдәм ит!» хәйрия акциясендә катнашты. Яңа портфельләр һәм уку кирәк-яракларын бу көнне биш алабугалы алды. 

Конференциядә катнашучылар алдында Мәгариф идарәсе башлыгы Елена Терентьева чыгыш ясады. Беренче чиратта, ул район мәгарифе өлкәсендә кертелгән яңалыклар турында сөйләде. Бердәм дәүләт имтиханнары да читтә калмады. Аның сүзләренә караганда, һаман да бер үк мәгариф учреждениеләренең чыгарылыш укучылары югары нәтиҗәләргә ирешә. Чыгыш барышында ул БДИ буенча сайлап алынган фәннәрдән кайбер медалистларның түбән күрсәткечләре турында мәгълүмат җиткерде һәм укытучылар һәм директорларның моңа җитди игътибар итүен сорады. Рөстәм Нуриев ассызыклаганча, мәктәптә тәрбия эшенә дә күп көч куярга кирәк, чөнки парк һәм скверлардагы хәлләр шуны күрсәтеп тора. Каникуллар вакытында кайбер балаларның вәхшилек кылганы билгеле булды. Укытучылар киңәшмәсе җанга рәхәтлек биреп тәмамланды — үзен күрсәткән укытучыларга район башлыгыннан Рәхмәт хатлары, ТР Мәгариф һәм фән министрлыгыннан грамоталар тапшырдылар.
«Мобиль укытучы» проекты кысаларында Рөстәм Нуриев авыл укытучылары өчен автомобиль бирергә карар итте. Берсенә Хлыстово башлангыч мәктәбенең башлангыч сыйныф һәм инглиз теле укытучысы Ольга Перминова ия булды, ул Танайкада да укытачак. Икенчесен Костенеево һәм Морт мәктәпләрендә эшләүче физика, информатика һәм математика укытучысы Алия Фәрхуллина алды.