Алабугада яшәүче Али Әмиров Чернобыльчеләр скверында 160тан артык җиләк-җимеш агачы утырткан

53 яшьлек Али Әмиров Чернобыльчеләр скверында 160тан артык җиләк-җимеш агачы утырткан.

Әмма бер проблема бар: ясмин, төче чия, груша, алма, слива, абрикос агачлары суга мохтаҗ. 

Моңа кадәр без аның турында язган идек — Али Әмиров җиләк-җимеш бакчасын инде өченче ел берүзе үстерә, бу шөгыль аңа бик ошый.
— Буш торган матур урынны күрдем дә биредә матурлык булдырырга уйладым, — ди ул.

Мәчет янындагы территориядә 167 агач үсә, шуларның 75е — төрле сортлы җиләк-җимеш. Али Әмиров үсентеләрне үз бакчасында үстергән, аннары бирегә күчереп утырткан. Орлык һәм үсентеләрне ул үз акчасына сатып ала. Ә менә груша аңа Таҗикстаннан кайтарылган. Сүз уңаеннан, Али үзе дә тумышы белән аннан, әмма Алабугада инде 26 ел яши, бу якларга килгәч тә, өйләнгән һәм биредә төпләнеп калган.

— Хәзер груша утыртырга уйлыйм, әмма әлегә аның үсентеләрендә үсеш сизелми. Күрәсең, климатка ияләшәләр. Ә менә абрикос, төче чия (черешня) һәм башкалар яхшы гына үсеп китте, — ди Али Әмиров.
Корылыктан үлгән агачлар урынына Али Әмиров башкасын утырткан. Агачларның күбесе үсеп киткән, бу язда алар чәчәк атты, көз көне алма һәм грушаларның беренче уңышы көтелә. Җиләк-җимеш агачын сатып алу, аны утыртып, үстерү — җиңел һәм арзан түгел. Әмма Али абзыйга халык һәм матурлык өчен акча кызганыч түгел.

— Агачларны шимбә һәм якшәмбе көнне карыйм, тик эштән соң һәр кич бирегә хезмәтемне күрергә киләм. Агач утыртып, үстерү — Аллаһы каршындагы иң изге эш, — ди Али Әмиров.

Агачларны сындырмыйлармы дигән сорауга ул кешеләрнең аның хезмәтенә хөрмәт белән каравын әйтте. 

Али Әмиров скверда нарцислар, бәрхет чәчәкләр, сирень куакларын да утырткан. Аларга да, агачларга кебек, су кирәк. Узган җәй эссе иде, шуңа су машинасы берничә тапкыр су алып килде, — ди Али Әмир улы. Бүтән су алыр җир юк.

— Майның яңгырлы булуы яхшы, июнь башында да туфрак дымлы булды, әмма алда — эссе көннәр һәм су сибү проблемасын ничек тә булса хәл итәргә кирәк. Янәшәдә генә кое бар, аңа кран куеп, атнага бер тапкыр булса да, су сибү өчен шланг сузу яхшы булыр иде, — ди Али Әмиров.
Бакча үсә, агачлар мәчет янында гына түгел, ә «Гуляй-парк» ягына да утыртылды. Алар арасында фикуслар да бар. Ә көзен Али Әмиров катальпа исемле яңа куаклар утыртырга тели. Аларның чәчәкләре матур һәм исе дә тәмле, ди ул. Үсентеләре дә бар.

Алабугалылар исә, җиләк-җимеш бакчасына игътибарын юнәлтә, ә кемдер Алиның хезмәте өчен борчыла. Редакциягә шалтыратып, ярдәм сорыйлар. Шунысын да билгеләп үтәргә кирәк, барлык үсентеләр дә каралган, терәүләр куелган, аларга прививкалар ясалган, бу матурлык корый калса, бик үкенечле булачак.

Район башлыгы Рөстәм Нуриев та бу мәсьәләгә игътибар итте. Ул тиешле хезмәткәрләргә якын арада мәсьәләне хәл итәргә кушты.