Алабуга нуры

Костенеево авыл җирлегенең Казиле авылында мемориал ачылды

Мәрмәр плитәләрдә шушында туып үскән 84 кешенең исеме уелган.

Костенеево җирлегендәге Казиле авылында Бөек Ватан сугышы елларында фронтка алынган һәм һәлак булган солдатлар хөрмәтенә обелиск ачылды.
Мәрмәр плитәләрдә шушында туып үскән 84 кешенең исеме уелган. Алар Алабуга һәм Мамадыш хәрби комитетларыннан чакырылган булган. Авыл җирлеге башлыгы Сергей Зеленовский сөйләвенчә, араларында су транспортында эшләгәннәр дә бар, алар Сарапулдан киткән. Сугыш елларында 28 кеше һәлак булган һәм хәбәрсез югалган. Һәйкәл чараларын авылдашлар үзләре, гражданнарның үзара салым җыю буенча республика программасы кысаларында җыйган. Республика ярдәмен дә кушып, ул 500 мең сум булган.
Әлеге мемориалны төзүдә Казиле кешесе, Түбән Каманың мактаулы гражданины Виктор Ларионов башлап йөргән. Авылда яшәүчеләр дә читтә калмаган, Виктор Евдоким улы исә төрлечә булышкан, матди ярдәм дә күрсәткән. Мемориалны ике ел кордылар, һәм быел 4 сентябрьдә ул ачылды.
Сергей Плеханов — Казиле авылында туып үскән кеше. Ул — Виктор Евдоким улының ярдәмчеләреннән берсе. Һәйкәлгә исемнәре уелган солдатлар исемлеген төзү белән шөгыльләнгән.
— Кайтучыларга караганда, бездә авылыбыздан азрак кеше китте диләр иде, ягъни моннан чакырылганнар аз. Элегрәк бу мәсьәлә белән беркем дә шөгыльләнмәгән диярлек. Алабуга хәрби комитеты һәм өлкән яшьтәгеләр белән дә бергә без зур күмәк эш башкардык. Авыл советы исемлекләрендәге 30 кеше урынына, 84 булды. Һәйкәл булдыруда бөтен авыл катнашты: кемдер урынны чистартты, чүп-чарны чыгарды, кемдер үз йортыннан электр утын биреп торды.
Кызганыч, мемориал төзүне башлап йөргән Виктор Ларионов үзе бу көнне күрә алмады — быел апрельдә ул вафат булды. Шулай да обелиск ачуда аның улы Игорь катнашты. Ул шундый мөһим эштә катнашулары, үз тарихларын һәм һәлак булган фронтовиклар истәлеген саклаулары өчен авылдашларына рәхмәт әйтте. Тантана соңында барысы да мемориал алдына чәчәкләр салды.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: