Өлкәннәрне кайгыртабыз

65 яшьтән өлкәнрәк алабугалылар өчен гериатрия кабинеты ачылды. Хәзер өлкән буын кешеләре махсус табиб-гериатрда күзәтүдә торып, киңәш алырга мөмкин.

– Алабуга районында 19 меңнән артык өлкән яшьтәге кеше яши. Аларның 80 проценты – бу кабинетның булачак пациентлары. “Демография” милли проекты кысаларында, без туучылар санын гына түгел, ә гомер озынлыгын да арттырырга тиеш. Бүген иң күп үлүчеләр, нигездә өч авыру буенча күзәтелә: йөрәк-кан тамыры авырулары, онкология һәм төрле җәрәхәтләр. Авыруларның бер өлешен (мәсәлән, йөрәк-кан тамыры авыруларын) гериатрия кабинеты булса, булдырмый калырга мөмкин, − ди Людмила Рыбакова.

Тантанада шулай ук Айрат Сафин да катнашты, ул пациентларны һәм бөтен медицина персоналын бу вакыйга белән котлады.

– Дәүләтнең эшкә яраклы халык турында гына түгел, ә өлкән яшьтәге кешеләр турында да кайгыртуы бик күңелле.  Иң мөһиме – өлкән яшьтәге гражданнарыбызның озак яшәве. Кабинетның уңышлы эшләвен һәм анда йөрүче өлкән яшьтәгеләрнең озак һәм бәхетле яшәүләрен телим, − диде ул.

Ачылу тантанасыннан соң мәртәбәле кунаклар бүлмәне карап чыкты, аларга монда пациентларга нинди ярдәм күрсәтеләчәге турында сөйләделәр.

– Мондый кабинет Алабугада гына түгел, республиканың башка шәһәр-районнарында да ачыла. Әлеге кабинетка 65 яшьтән өлкәнрәк кешеләр йөриячәк, аларны терапевт, шулай ук башка белгечләр дә карый алачак. Әйе, моңа кадәр бу вазифа терапевтларга йөкләнгән иде, әмма бу кабинет булу, аларны төп эштән азат итми. Алар барыбер өлкән яшьтәгеләр белән эшләвен дәвам итәчәк. Нинди дә булса сорау килеп туганда, гериатрия бүлегендәге табиб һәм терапевтка фикер алышырга мөмкинлек булачак. Консилиумга башка белгечләр дә чакырыла. Табиб-гериатр һәр кешегә киңәш бирергә, теге яисә бу даруны тиешле күләмдә яза белергә тиеш. Бу белгечлек буенча бездә мондый хезмәткәр бар инде. Ул – Рәсимә Миннегалиева, – дип сөйләде үзәк район хастәханәсенең табиблар комиссиясе рәисе Гөлнара Юнусова.

Шунысын да билгеләп үтәргә кирәк, тиздән Алабугада ун урынга исәпләнгән гериатрия бүлеге дә пәйда булачак.

Әлеге кабинет “Демография” милли һәм “Өлкән буын” федераль проектлары ярдәмендә барлыкка килде.

“Бердәм Россия” фракциясе башлангычы белән Татарстан Республикасының Дәүләт Советында быел республикада милли проектларны тормышка ашыру барышын тикшерү буенча Эшче төркем оештырылган. Алабуга муниципаль районында мондый эшне шулай ук “Бердәм Россия” бүлеге башкара.
“Демография” милли проектын тормышка ашыруда төп юнәлешләрнең берсе  – гериатрия бүлмәләре эшчәнлеге һәм эшкә сәләтле яшьтән олырак гражданнарны диспансеризацияләү.

2019-2021 елларда милли проектларны тормышка ашыруга Татарстанда 44,6 миллиард сум тотылачак. “Демография” милли проектының төбәк өлешенә быел өлкән буын өчен 546 миллион сум акча тоту каралган. 2009 елда профилактика тикшерүләрен үтүдә,  диспансеризацияләүне дә кертеп, эшкә сәләтле яшьтән олырак гражданнарның 22,5 проценты катнашса, 2024 елга бу күрсәткеч 70 процентка җитәр дип ниятлиләр.