Алабуга нуры

Алабуга районы

18+
2024 - Гаилә елы
ВАКЫЙГАЛАР

Һәр гаиләдән – ике йолдыз

Октябрь аенда шәһәрдә "Ике йолдыз" парлап җырлау бәйгесен оештыру да гадәткә кереп китте. Кичә "Башак" клубында аның муниципаль туры булды.

Мәктәпкәчә яшьтәге балалар учреждениеләрендә узган сайлап алу конкурсында җиңүчеләр сәхнә йолдызлары булырга ныклап әзерләнгән. Әти-әнисе яисә туганы белән чыгыш ясаучыларның осталыгы биш номинация буенча бәяләнде: халык җырлары, автор җыры, җыр традицияләрен саклау, туган телдәге жырлар.
3 яшьтән 5 яшькә кадәрге балалар арасында халык җырларын башкаруда удмурт телендәге җыр белән 31нче бакча вәкилләре 1 дәрәҗә дипломга лаек булды. 2, 3 дәрәҗәгә 5нче һәм 20нче бакча иреште.
"Туган тел" номинациясендә 25нче һәм 17нче бакча балаларына тиңнәр табылмады. Автор җыры белән чыгыш ясауда 30нчы бакча җиңде, 2 урында - 5нче балалар бакчасы. Эстрада вокалы юнәлешен сайлаган "Россия" дуэты (1нче бакча) 1 дәрәҗәле, 32нче бакча 2 дәрәҗәле, Бехтерево авылы балалар бакчасы вәкилләре 3нче дәрәҗәле диплом белән бүләкләнде.
Традицион җыр башкарып җиңү яулаган 4 яшьлек Алина Миннәхмәтова әнисе Анжела белән ("Палитра" дуэты) "Картина маслом" җырын башкарган иде.
- Мин җырларга яратам. Барлык бәйрәмнәрдә дә җырлыйм, - ди ул. Шул ук балалар бакчасына йөргән Виктория Воронко быел бәйгегә җырны озак өйрәнүен әйтте.
- Әмма миңа чыгыш ясау бик тә ошый, - ди Вика.
Ул әнисе белән бу конкурста өч ел рәттән катнаша, аларның дуэты былтыр җиңү яулаган булган. Шушы ук номинациядә Танайка авылы балалар бакчасы вәкилләре 2 дәрәҗә диплом алды, алар чисталык турында җыр башкарды. 3 дәрәҗә диплом 25 нче бакча дуэтына бирелде.
Конкурсның икенче өлешендә 5-7 яшьлек балалар катнашты. Кече яшьтәгеләрнең самимилеге сокландырса, бу төркем тырышлыклары белән ихтирам уятты. Шунысын әйтергә кирәк, быел балалар белән чыгыш ясаучы әтиләр күбрәк булды. Алар гармунда да уйнады, барабан да какты, җырлап биеде дә.
Көлкеле мизгелләр дә булды. Традицион җырлар башлангач, беренчесен "Антошка" дип игълан иттеләр. Аннан соң да бер дуэт шушы ук җырны сайлаган булып чыкты. Залдагылар, елмаешып, алдагысы да шул булыр микән, диеште. "Антошка"лар күп булса да, һәрберсе җырны үзенчә тәкъдим итеп, балалар матур чыгыш ясады.
"Автор җыры" номинациясе буенча 25нче балалар бакчасы дуэтына югары бәя бирелде. Алты яшьлек Юлия Котельникова әнисе Регина белән Алабуга турында җыр башкарды. Аны балалар бакчасының музыка тәрбиячесе Елена Семенова язган. 2 урында 16нчы бакча, 3 урында 35нче бакча вәкилләре.
"Туган тел" номинациясендә 1 дәрәҗә диплом 29 нчы балалар бакчасы дуэтына, 2 урын 34нче бакча һәм 3 урын 28нче бакча вәкилләренә булды. 28нче бакчаның Әниле-уллы "Йолдызлар" дуэты "Кәләпүшем" җырын башкарды. Инсаф Миңнеәхмәтовның шигырь конкурсларында катнашканы булса да, сәхнәгә чыгып җырлавы беренче тапкыр. Ике телдә дә матур итеп чыгышлар ясарга өйрәтүче музыка тәрбиячесе Зилә Баһавиевага ул бик рәхмәтле.
Җыр традицияләрен саклаучылардан 26нчы бакча дуэты аерылып торды. Совет халкының яраткан мультфильмы "Эләгерсең әле!" ("Ну, погоди!") геройлары булып киенгән Лиза һәм аның әтисе Евгений Маматов, конкурста беренче тапкыр булсалар да, 1дәрәҗәдәге дипломга лаек булды. 30нчы һәм 32нче бакча вәкилләре 2 һәм 3 дәрәҗәдәге диплом алды.
Эстрада җырларын башкаруда иң осталар 34нче бакча балалары булды, 18нче һәм 39нчы бакча дуэтлары 2 һәм 3 дәрәҗәле диплом алуга иреште. Тамашачылар мәхәббәтен 12нче балалар бакчасы дуэты яулады.
Шәһәр балалар бакчалары арасында 5, 25, 32, 34нче балалар бакчаларында тәрбияләнүчеләр актив катнашты. Һәр яшь төркемендә чыгыш ясап, алар төрле номинацияләрдә җиңде. Район балалар бакчаларыннан Танайка һәм Бехтерево балаларын билгеләп үтми булмый. Танайкалылар ике номинациядә 2 дәрәҗә диплом иялләре булды.
"Ике йолдыз" муниципаль конкурсының сайлау туры җырга-моңга гашыйк, сәләтле балаларыбызның күплеген күрсәтте. Сәхнәгә чыккан һәр бала өчен дулкынланып, алар белән эшләүче музыка тәрбиячеләре ут йотып торды. Аларның зур зал тулы тамашачы һәм таләпчән жюри каршында чыгыш ясавы - үзе үк тәвәккәллек һәм җиңү билгесе.

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев