Сезнең хезмәт – илгә мәхәббәт ул
Алабуга шәһәренең Мәдәният сараенда 15 ноябрьдә Авыл хуҗалыгы һәм эшкәртү сәнәгате хезмәтчәннәре көне уңаеннан зур тантана үтте.
Көз җиткәч, басу-кырлардагы, терлекчелек фермаларындагы эшләргә йомгак ясау, авыл хуҗалыгы алдынгыларына олы рәхмәтебезне белдерү – иң күркәм традицияләребезнең берсе.
Мәдәният йортына килеп керүгә үк бәйрәм мохите хөкем сөрде. Мәрмәр залының уртасына зур икмәк куелган иде, ә аның тирәсендә авыл хуҗалыгы һәм эшкәртү сәнәгате предприятиеләре күргәзмәсе ачылды.
Бәйрәмдә Алабуга районы башкарма комитеты җитәкчесе Рөстәм Нуриев һәм Татарстан Республикасы Авыл хуҗалыгы һәм азык-төлек министры урынбасары Тәлгать Таһирҗанов катнашты.
Рөстәм Нуриев билгеләп үткәнчә, авыл хуҗалыгы – икътисадның төп тармакларының берсе. Нәкъ менә авыл хезмәтчәннәре безнең районның һәм тулаем алганда илнең азык-төлек куркынычсызлыгы гаранты булып тора. Слетта катнашучыларны Тәлгать Таһирҗанов та сәламләде. Ул бу өлкәгә кагылышы булган һәр хезмәткәргә зур рәхмәт белдерде.
– Без Россиядә агросәнәгать комплексы өлкәсендә 5нче урында һәм сөт җитештерүдә 1нче урында торабыз. Бу дәрәҗәне саклап калу – көндәлек, четерекле хезмәт таләп итә. Бүген, авыл хуҗалыгында даими рәвештә республиканың 65 мең кешесе эшли һәм алар бөтен республиканы тәэмин итә. Алабуга районы хезмәтчәннәре шулай ук республиканың авыл хуҗалыгы үсешенә лаеклы өлеш кертәләр.
Аннары бүләкләү тантанасы башланды. Бу көнне бар гомерен, сәләтен һөнәренә багышлаган, бу өлкәләрдә ирешкән уңышлары өчен иң яхшыларны тәбрикләү тантанасы булды. Аларга Татарстан Республикасы Авыл хуҗалыгы һәм азык-төлек министрлыгының Мактау грамоталары һәм Алабуга районы башлыгының Мактау грамоталары бирелде.
“Иң яхшы шәхси ярдәмче хуҗалык” номинациясендә җиңүче Иске Юраш авылыннан Фәрит Әхмәтовка Алабуга районы башкарма комитеты җитәкчесе исеменнән махсус бүләк – саву аппараты тапшырылды.
Билгеләп үтик, бүген Алабуга районында 10 авыл хуҗалыгы предприятиесе һәм 32 крестьян-фермер хуҗалыгы эшли. Урып-җыю кампаниясе барышында 62 мең тоннадан артык ашлык суктырылган, бу уртача уңыш гектарыннан 25 центнер тәшкил итә. Ашлык суктыру буенча иң югары нәтиҗәләргә “Нократ таңнары”, “Яшь Көч”, “Морт”, “Якты үзән”, Ямалетдинов Илфар КФХлары ирешкән.
“Нократ таңнары” агрофирмасы яшелчәчеләре моңа кадәр булмаган уңыш – 15 мең тонна яшелчә һәм 15 мең тонна бәрәңге җыеп алганнар. Бу елның 10 аенда район хуҗалыкларында 13 мең тоннадан артык сөт һәм 1,7 мең тонна ит җитештерелгән. “Якты үзән”дә, “Яңа Юраш” һәм “Яшь көч” агрофирмаларында эре мөгезле терлекләр саны арткан.
Бу көнне авыл хуҗалыгы тармагы ветераннарына рәхмәт сүзләре әйтелде һәм бүләкләр тапшырылды.
Авыл кешесенең хезмәте мактауга лаек, ләкин чагыштыргысыз дәрәҗәдә катлаулы да. Ул һәркемнең көченнән дә килми. Әлеге хезмәт эшкә тулысынча бирелгәнлек, нык ихтыяр, тырышлык белән эшли белүне таләп итә. Бу юнәлештә хезмәт куючыларның югары һөнәри осталыгы, фидакарьлеге, түземлелеге, ныклыгы хөрмәткә һәм ихтирамга лаек.
