Алабуга нуры

Ут эчендә – балалар (фотолар)

15 майда өч бала дөрләп янган йортта кала. Ярдәмгә килеп җиткән алабугалыларның батырлыгы гына сабыйларның гомерен саклап кала.

Ут эчендә калган сабыйлар коткарылды. Ярый әле бу вакытта йорт янәшәсеннән арыслан йөрәкле ирләр узып барган, чөнки башкача булуын күз алдына да китерү мөмкин түгел. Ут белән саксыз эш итү аркасында 3 гаилә (ә алар арасында 6 бала да бар) йортсыз калды.

Мәскәү урамындагы 47 нче йортның беренче катында азык-төлек кибете урнашкан. Көн уртасында кибетче төтен исе сизә, тик урамда чүп-чар яндыралардыр дип уйлый. Күп тә үтми, кибеткә хатын-кыз йөгереп керә һәм икенче каттагы фатирында янгын башлануын, өйдә балалар калуын көч-хәл белән аңлата. Сатучы янгын сүндерүчеләрне, ашыгыч ярдәм машинасы чакыра.

Бу вакытта йорт яныннан машинада узып барган пенсионер Илсур Галиев (рәсемдә) ургылып чыккан төтенне күреп ала һәм уйлап та тормыйча ярдәмгә ташлана. Бу вакытта инде фатирлар урнашкан икенче катка менә торган баскычлы агач янкорманы тулысынча ут чолгап алган, ә бер ир-ат веранда аша фатирга менәргә тырыша. Илсур һәм КАИның Алабуга филиалы студенты Фәнис Гарифуллин кибеткә керү ягында булган кечкенә түбәдән менеп фатир тәрәзәсен ваталар һәм төтеннән буылып елап утырган ике баланы күреп алалар. Илсур аларны бер-бер артлы Фәнискә биреп урамга чыгара. Ут чолгап алган күрше бүлмәдән өченче баланы эзлиләр, тик соңыннан беленгәнчә, бала үзлегеннән урамга чыккан булып чыга.

Балаларны коткарганнан соң, Илсур документ һәм акчаларны чыгарырга дигән тәкъдим ясый, тик бу вакытта килеп җиткән янгын сүндерүчеләр иргә үз тормышын куркыныч астына куймаска киңәш итәләр.

Сабыйларны уттан коткаручылар үзләрен геройлар дип һич тә санамыйлар. Студент егет комментарий бирүдән баш тартты, ә өченче коткаручы бөтенләй югалды. Илсур Галиев та, янгын сүндерүчеләр килгәннән соң, янгын урыныннан тиз арада китеп бара. Исемен белеп алуларына да гаҗәпләнә.

- Үземә куркыныч яныймы, юкмы дип уйлап тору минем яшьтә юк инде ул, - ди ике кыз әтисе һәм ике онык бабасы булган Илсур. - Бу бит безнең гражданлык бурычыбыз. Кыска гына гомердә кешеләргә ярдәм итеп яшәргә кирәк.

Төтен исе белән агуланган ана һәм балалар хастаханәгә китерелә. Табиблар әйтүенчә, бүгенге көндә аларның сәламәтлегенә куркыныч янамый, зыян күрүчеләр бүгенге көндә туганнары янында яши.

Кемнеңдер ут белән саксыз эш итүе аркасында өч гаилә - биш өлкән кеше һәм алты бала баш өстендә түбәсез калды.

Янгынга катлаулыкның югары дәрәҗәсе - икенче дәрәҗә бирелгән. Утны сүндерүдә 8 берәмлек техника, газ-төтеннән саклаучы 3 хезмәт катнашкан.

Әллә кәбисә елы гаепле, әллә кешенең игътибарсызлыгы, тик менә Алабугада һәм районда янгын чыгу очраклары артканнан-арта бара.

Үз саксызлыклары аркасында кешеләрнең утта һәлак булулары, барлык милектән колак кагулары бик кызганыч.

Апрель ахырында мунча миченнән ут чыгып Комсомол тыкрыгында ике йорт һәм аның корылмалары янып көлгә әйләнде. 7 майда шул ук тыкрыкта мунча янды. Шул ук көнне Олы Качка авылында янган йортта ир-ат мәете табылу турында хәбәр алынды. Янгын йорт хуҗасының коры үлән яндыруы сәбәпле килеп чыккан. Ир-атның һәлак булу сәбәпләре ачыклана.

5 май төнендә 01 телефонына Бехтерево авылындагы йортта янгын чыгу турында хәбәр алына. Пожар 33 минуттан сүндерелә, ә керү ишегенә бер метр кала 1963 елгы ир-ат мәете табыла. Аның йорт хуҗасының абыйсы булуы ачыклана һәм, күршеләр әйтүенчә, бераз алдарак аны сәрхүш хәлдә күргән булалар. Күрәсең, янгын башлангач, ул котылу өчен ишекне тиз генә таба алмаган. Хәер, бу йорт моңа кадәр дә янгын сүндерүчеләрнең аерым исәбендә тора. Йорт хуҗасына берничә мәртәбә пожар куркынычсызлыгы буенча инструктаж үткәрелүгә карамастан, «кызыл әтәч» монда да үзенең текә характерын күрсәтә.

Бурдан кала, уттан калмый, ди халык. Фотоларга карап моның шулай булуына тагын бер ышанасың. Үзегезнең, якыннарыгызның, күрше-күләннең тормышын куркыныч астына куймагыз! Ут белән сак булыгыз!

Р.Нуриева

Н.Касыймова фотосы

Теги: 250
Нравится
Поделиться:
Реклама
Комментарии (0)
  • 23 октября 2017 в 14:24
    Защити себя!