13-19 февральгә йолдызнамә

Кучкар 
Көндәлек мәшәкатьләр басып алыр. Сабырлык җыеп, авырлыкларны җиңеп чыгарга тырышыгыз. Шәхси мөнәсәбәтләргә күбрәк вакыт калдырыгыз. Ялларда гаилә белән ял итегез.

Үгезбозау 
Кыенлыклар һәм киеренке мизгелләргә карамастан, атна күңелле һәм нәтиҗәле узачак. Элек башлаган эшләрне төгәлләп, яңасына тотыначаксыз. Күптәнге танышны очратып, хисләр яңаруы мөмкин.

Игезәкләр 
Атна башында аңлашылмаучанлыклар килеп чыгуы бар. Элек сез яхшы аңлаган һәм ярдәм иткән кешеләр дә үзләрен сәеррәк тота. Борчылмагыз: тиздән барысы да үз җаена кайтачак.

Кысла 
Бөтен көчегезне, игътибарыгызны эшкә юнәлтегез. Авыр эштән курыкмыйча, үҗәтләнеп эшләгән Кыслаларны зур уңыш көтә. Атна ахырында теләгәнегезгә ирешерсез.

Арыслан 
Атна башында катлаулы мәсьәләләрне җайга салу белән шөгыльләнерсез. Әҗәткә акча бирмәгез. Ерак юлларга чыгудан да тыелып торыгыз. 

Кыз 
Бу — катлаулы атна. Проблемаларны хәл итүдә җиңел юлларны эзләмәгез. Шикле кешеләрдән, яңа танышлардан ераграк торыгыз.

Үлчәү 
Мөһим эшләр өчен кулай атна түгел. Тирә-юньдәгеләргә ярарга тырышасыз, ләкин башкалар моны күрмәгәнгә салыша. Эштә дә сездән башкалардан күбрәкне таләп итәләр. Атна ахырында сез яңа дуслар табарсыз.

Чаян 
Атна башы эш һәм бизнес күзлегеннән караганда бик үк уңайлы вакыт түгел. Чаяннарның профессиональ һәм шәхси мәнфәгатьләрне аера алмау сәбәпле кыен хәлдә калуы бар. Ашыгыч карарлар кабул итмәгез.

Укчы 
Танышларыгыз белән бар булган серегезне уртаклашмагыз. Идеяләрегезнең тормышка ашасына ышанасыз икән — уңыш таулар артында түгел. Финанс өлкәсендә яхшы үзгәрешләр көтелә.

Кәҗәмөгез 
Бу атнада сез күп нәрсәгә ирешә алачаксыз. Аны юкка сарыф итмәгез. Атна азагында ял итсәгез, яхшырак булыр. Сәламәтлегегезне кайгыртыгыз.

Сукояр 
Атна сезгә күңелле сюрпризлар, бүләкләр һәм күптән көтелгән очрашулар вәгъдә итә. Кадерле кешеләрегез белән ачуланышмагыз.

Балык 
Ашыкмыйча гына, уйлап карарлар кабул итә торган тыныч һәм мөһим атна. Ниндидер яңа һөнәр үзләштерәчәксез.