Алабуга районы башлыгы «Август-Алабуга» коллективы белән очрашты

«Алабуга» МИЗы резидент-заводы мәйданчыгында хезмәт коллективының АМР башлыгы Рөстәм Нуриев белән очрашуы узды. Чарада Татарстан Республикасы юстиция министрының беренче урынбасары Айнур Галимов катнашты, ул Алабуга районында спортны һәм туризм тармагын үстерү өлкәсендә алып барылган эшне аерым билгеләп үтте.

Очрашу кысаларында Алабуга муниципаль районы башлыгы Рөстәм Нуриев компаниянең — хезмәт коллективы һәм җитәкче Владимир Алинның — район икътисады үсешенә һәм социаль проектларга ярдәм итүгә зур өлешен кертүен ассызыклады.

— Владимир Львович — шәһәр һәм район тормышына битараф булмаган кеше, аның башлангычы белән спорт өлкәсендә үзгәрешләр башланды. 2022 елдан без футбол командасын җыйдык, профессиональ тренерны чакырдык. Нәтиҗәдә — җиңү, Югары лигада 2 урын. Узган елдан «Олимп» спорт мәктәбе мәйданчыгында укучылар белән эш башланды, — диде ул.

Шәһәр башлыгы сүзләренчә, бу футболны гына түгел, ә физик культура һәм гомумән спорт өлкәсен үстерүгә мөһим стимул булып хезмәт итә.

Үз чиратында, муниципалитет совет чорында популяр булган проектны — «Күңелле стартлар» шәһәр спартакиадасын торгызды, ул үсеп килүче буында спортка мәхәббәт тәрбияләүгә һәм коллектив рух формалаштыруга юнәлдерелгән. Ярышларда җиңү өчен алынган грантлар акчасы ярдәмендә белем бирү учреждениеләре матди-техник базаны яңарта ала, бу командалар өчен өстәмә стимул булып тора.

Район башлыгы Алабуга муниципаль районының социаль-икътисади үсешенең төп нәтиҗәләре, агымдагы елга планнары белән уртаклашты һәм очрашуда катнашучыларның сорауларына җавап бирде. Аерым алганда, предприятие хезмәткәрләре күпфункцияле үзәкнең шәһәр бүлегенә язылганда зур чират булуына игътибар итте, үзәктә нибары бер белгеч кабул итә. Тагын бер үтенеч шәһәрдә 30 яшьтән өлкәнрәкләр өчен мәдәни-массакүләм чаралар оештыру мәсьәләсенә кагылды. Шәһәрдән чыгу урынында юл чишелеше төзү кирәклеге турында да искә алдылар — бу проект, район башлыгы билгеләп үткәнчә, агымдагы елга планнарда. Очрашуда яңгыраган барлык сораулар контрольгә алынды. ТР юстиция министрының беренче урынбасары Айнур Галимов үз чыгышында шәһәр мэрына халык белән ачык диалог өчен рәхмәт сүзләрен җиткерде.

— Без мондый очрашуларны республика буенча күп үткәрәбез, әмма шулкадәр ачык булу һәм ничек бар, шулай итеп җавап бирү бик сирәк очрый. Алабуга Татарстан өчен генә түгел, федераль әһәмияттәге барлык шәһәрләр өчен дә үрнәк булып тора. Биредә туристлык юнәлешен үстерү, мәдәни мирас объектларын саклау өлкәсендә алып барылган эш республика җитәкчелеге тарафыннан югары бәяләнә. Сездә үткәрелә торган вакыйгалар турында бөтен Россия белә, һәм бу ихтирамга лаек, — диде Айнур Галиев.