Алабуга шәһәренең «1нче гимназия — Милли белем бирү үзәге» балалар бакчасында Ураза бәйрәме узды

Тәрбиячеләр бу чараны яшь буынга татар халкының милли мирасын, аның гореф-гадәтләрен түкми-чәчми җиткерү, милли аң тәрбияләүгә, туган телгә, табигатькә, Ватанга карата мәхәббәт уяту максатыннан чыгып әзерләде. Малайлар һәм кызлар бәйрәмдә дин, гореф-гадәт төшенчәләре турында башлангыч мәгълүмат алды. Моннан тыш, табигатьне ярату, үсемлекләргә, төрле җан ияләренә сакчыл мөнәсәбәт булдыру, табигатьтә булганда үз-үзеңне тоту кагыйдәләре искәртелде. 

Бәйрәмдә балалар шигырьләр сөйләде, матур җырлар башкарды, мавыктыргыч уеннар да читтә калмады.

Әйтергә кирәк, балалар бакчасы җитәкчесе Гүзәл Аслямова, методист Гөлия Зульмиева балаларга рухи-әхлакый тәрбия бирүдә ислам кыйммәтләрен куллануга зур игътибар бирә. Тәрбиячеләр Раилә Гатауллина, Сиринә Хаметшина һәм Равилә Юнысова бәйрәмне оештыруда зур көч куйды.
Равилә ЮНЫСОВА

ФОТО: Шәхси архивтан.