Алабуга ветераны Кирилл Тимряков юбилеен билгеләп үтте

Кирилл Степановичның тууы аның әти-әнисе өчен бик зур бүләк була. Үз балалары булмый торгач, гаилә балалар йортыннан 4 яшьлек Александраны кызлыкка алырга җыена. Алар аны үз кызлары кебек чын күңелдән ярата. Аннары Ходай аларга малай бүләк итә, аңа Кирилл дип исем бирәләр. Ул шук бала булып үсә, хайваннарны сөя, дуслары белән уйнарга һәм елгада су коенырга ярата. Кириллның сугыш кебек куркыныч сынауны узарга туры киләчәген беркем дә күз алдына китерә алмый. Бөек Ватан сугышы башланганда аңа 15 яшь була. Ул әтисе урынына колхоз умарталыгында кизү тора (әтисе колхозның ревизия комиссиясе рәисе вазифасын үти, ә төнлә умарталыкны саклый).
«Мин 22 июньгә каршы төндә кизү тордым. Иртән безгә Германиянең илебезгә һөҗүм итүе, сугыш башлануы турында игълан иттеләр.
Мин өйгә кайтуга, авылда сугыш турында гына сөйлиләр иде. Икенче көн рәттән хәрби комиссариатка ир-атларны чакыртып, фронтка 10-12шәр кеше озаттылар. Берникадәр вакыттан соң һәлак булганнар турында хәбәрләр килә башлады. Башта яшь солдатлар фронтка китте, аннары өлкәнрәк, соңыннан аннан да өлкәнрәк яшьтәгеләр озатылды», − дип искә ала ветеран. 
Колхоз тормышы тагын да катлаулана барган. Булган бар нәрсә фронтка җибәрелгән. 1942 ел ахырында Кирилл Степановичны иптәшләре белән бергә булачак яшь сугышчыларны әзерләүгә җибәрәләр, ә инде 1943 елда аңа да чират җитә — 17 яшьлек егет фронтка китә. 
«Бу вакытта фронтта хәлләр бик катлаулы иде. Немецлар Мәскәүгә үк килеп җитте, Ленинград блокадада калды. Украина дошманнар кулында иде. Алар Сталинград, Иделгә якын килде. Кызыл Армиянең хәле бик авыр иде», − дип сөйли ул.
Җитди әзерлектән соң, аны башка солдатлар белән бергә Ленинградка озаталар. Анда аларга хәрби вакыйгаларның бөтен көчен тоярга, канонаданы ишетергә туры килә. Соңрак Кирилл Тимряков полкын Балтыйкка күчерәләр, һәм шунда җиңү хәбәре дә билгеле була. 
«Фашистлар Германиясен җиңү турында игълан иткән көнне мин Либава шәһәрендә күзәтчелек пунктын әзерләүдә булдым. Без телефон чыбыкларын суза идек. Һәм безгә шунда сугыш тәмамлану турында игълан иттеләр! Шатлыктан мин телсез калдым, ниһаять ничә ел көне-төне барган сугыш тәмамланды», − дип искә төшерә Кирилл Степанович.
Сугыш беткәннән соң аның хезмәте флотта дәвам итә. Яшь фронтовик 1950 елда гына демобилизацияләнә. Гаилә корып, бала тугач, Кирилл Тимряков яңадан хезмәткә кайтырга карар кыла. Тормыш иптәше белән алар дүрт бала тәрбияләп үстерәләр, хатыны аңа һәрвакыт ярдәм итә. Хезмәттән киткәч, ул авыл хуҗалыгында эшли башлый, тиешле белем ала. Лаеклы ялга куркынычсызлык техникасы буенча рәис вазифасыннан чыга. Хәзер ветеран үзенең яраткан гаиләсе − балалары, оныклары һәм оныкчыклары янәшәсендә яши. Ул шундый ук күтәренке рухта һәм көрәшкә күтәрелергә әзер булып кала.