«Новая Кама» һәм «Алабуга нуры» газетасы редакциясе почтальоннарны бүләкләде

Рита Хәсәнова һәм Венера Ибниевага редакциядән бүләк тапшырылды, хезмәтләре өчен ихлас рәхмәт сүзләре әйтелде. 

Рита Хәсәнованы без эш урынында — Тынычлык проспекты, 34 адресы буенча урнашкан 2 нче почта бүлекчәсендә таптык. Почтальон булып инде 9 ел эшли. Бу өлкәгә очраклы килеп эләктем, ди ул. Заводта кыскарытылуга эләккәч, күршесе аңа почтада хат ташучы булырга тәкъдим итә. 

— Мин ризалаштым, моңа бик шат һәм канәгать. Минем эшем искиткеч. Пенсия өләшәм, хатлар, газеталар таратам, — ди Рита Хәсәнова. 

Аның участогында өлкән яшьтәге кешеләр күп. Алар барысы да аны түземсезлек белән көтеп ала, аларга, хатлардан бигрәк, мөлаем почтальон белән сөйләшү ошый. 

− Әбиләремнең мине яратканын сизеп яшим: мине күрүгә шатланалар. Ялга чыксам — күңелсезләнәләр. Без бер-беребезгә туганнар кебек инде, — ди Рита Мансур кызы.

Әлбәттә, якыннарыбызга без һәрвакыт яхшыны гына телибез, менә безнең Рита Хәсәнова да үзенең әби-бабайларына район газеталарын тәкъдим итә. Әйтүенчә, ул үзе дә безнең газеталарны яратып укый, лаеклы ялга чыккач, үзем дә язылачакмын, ди.

Ә авыл почтальоны Венера Ибниева безнең редакциягә үзе килде. Ул Татар Дөм-Дөме авылында эшли һәм хат ташучы вазифасын китапханәче эше белән бергә алып барырга өлгерә.

— Башта авыл җирлеге башлыгы почтальонны ялы вакытында алыштырып торуны сорады. Ә ул киткәч, миңа корреспонденцияне таратырга тәкъдим иттеләр. Эшли башладым, һәм калдым да, әмма китапханәдә эшләүне туктатмаска булдым, − дип сөйли Венера Зиннур кызы.

Аның сүзләренчә, почтальон эшендә иң мөһиме — кешеләр белән аралашу, чөнки халыкка теге яки бу басмаларга язылуны рәсмиләштерергә, нәрсәдер киңәш итәргә кирәк. 

— Газетасыз яши алмаучы кешеләрем бар, 4-5 мең сумлык язылалар. Иписез яшәсәләр дә, газетасыз яши алмыйлар, — дип көлә почтальон.