Төп җиңү – гаиләсе

Бу гади бәйге генә түгел, анда мөмкинлеге чикләнгән кешеләрне тулы тормыш белән яшәргә чакыручы инвалид хатын-кызлар катнаша. Конкурс андый кешеләргә карата җәмгыять тарафыннан тигез караш булдыруда ярдәм итә.
Мондый конкурс республикада өченче ел рәттән оештырыла. Гүзәл - Алабугадан беренче катнашучы.
− Ул актив тормыш позициясе белән яши. Бала вакыттан церебраль паралич диагнозы алган Гүзәл өчен өч бала тудыру - батырлык ул. Ул бит әле инвалид әниләр өчен "Балачак дөньясы" бүлмәсенең җитәкчесе дә, − ди аңа бәйгегә әзерләнергә булышучы Диләрә Мироваева.
Гүзәлгә ярдәмгә Диләрә генә түгел, Мәгариф идарәсе дә, мәдәният сарае, һөнәри фотографлар һәм визажистлар алынды. Аның иң зур терәге, билгеле - тормыш иптәше, балалары һәм әнисе, алар һәрвакыт янәшә.
− Без 2009 елда реабилитация үзәгендә таныштык, ул вакытта мин энемне дәваларга йөртә идем, − дип сөйли Гүзәлнең ире Илдар Бакиров.
Әмма, алар бер күрүдә гашыйк булмаганнар.
− Мин үзем аның янына беренче булып танышырга килдем һәм урамда йөрергә чакырдым. Әнә шулай танышып киттек, − ди Гүзәл.
Әйткәнебезчә, Бакировлар өч бала үстерә.
− Без баштан ук гаиләнең зур булуын теләдек, үзем шундый гаиләдән. Ничек ниятләсәк, шулай килеп чыкты, ике кыз һәм бер малай туды: Энже, Самина һәм Азат. Кызларыбызның зурысы рәсем ясарга ярата, уртанчысы әнисе шикелле, бик актив. Бәләкәй Азаматка 1 яшь, чын егет булып үсә, бүгеннәне үк холкын күрсәтә, − дип фикерләрен уртаклаша гаилә башлыгы.
Конкурс Казанда 9 декабрьдә үтәчәк. Хәзерге вакытта Бакировлар гаиләсе бөтен көчен биреп шуңа әзерләнә.
− Анда катнашучыларның һәрберсе җиңүгә лаек, дип ышанам. Спортчылар әйтмешли, иң мөһиме − катнашу. Мин болай да җиңүче: мин − әни, яратучы һәм яраткан хатын, − ди Гүзәл Бакирова.