Алабугада урамнарны кардан чистартуга шәһәр оешмалары да кушылды

Кичә Төзекләндерү идарәсе хезмәткәрләренә шәһәр предприятиеләре дә кушылды, алар кар түгү өчен өстәмә техника бирде. 

Мисалга, "Автотехникс«тан 5 «КамАЗ», МТЗдан — төягеч, Алабуга Җылылык челтәрләреннән — «КамАЗ» һәм төягеч, "Алабуга керамикасы«ннан — 4 «КамАЗ» эшләде. Иртәнге сәгать сигездә тракторлар, төягечләр, грейдерлар һәм "КамАЗ"лар Нефтьчеләр проспекты буйлап кар чистартырга кереште. Эш кичкә кадәр барды. 

— Карны көн саен җыештырабыз һәм түгәбез. Калган предприятиеләр атна ахырына үз техникасы белән безгә кушылачак, — дип өстәде Валерий Исаев.

Әйтергә кирәк, шәһәрнең төп проспектында һәм Казан урамында кар белән көрәшкә 26 берәмлек техника җәлеп ителде.

Кар җыештыруда техника гына түгел, эшче куллар да катнаша. Юл эшчеләреннән 20 кеше көн дә тукталышларны, җәяүлеләр кичүләрен, парк һәм скверларны, шулай ук техника керә алмый торган урыннарны кардан арындыра.