Рөстәм Нуриев ялда булган хәрбиләр белән очрашты

Очрашу ике сәгатьтән артык дәвам итте. Бу вакыт эчендә күп нәрсә турында сөйләштеләр. Беренче чиратта, әлбәттә, хәрбиләр һәм аларның гаиләләренең ихтыяҗлары турында сүз чыкты. Бүгенге көндә проблемалы мәсьәләләр аз, күбесенчә бу кураторларның мобилизацияләнгәннәр һәм аларның гаиләләре белән җайга салынган эшенең казанышы. Сораулар белән беренче чиратта аларга мөрәҗәгать итәләр. 

Исегезгә төшерәбез, мобилизацияләнгәннәргә ярдәм күрсәтү өчен кураторлар билгеләү район башлыгы инициативасы иде. Җитәкче фикеренчә, иң мөһиме: беркем дә игътибарсыз калмасын. Кураторларның төп бурычларының берсе — гаиләләргә ташламалар һәм аларга бүген күрсәтергә әзер булган ярдәм турында мәгълүматны вакытында җиткерү.

Мәсәлән, торак-коммуналь хуҗалык хезмәтләре өчен түләүләр соңга калган очракта, мобилизацияләнгәннәрнең гаиләләренә пеня исәпләнми, алар чүп чыгару өчен түләүдән тулысынча азат ителгән. Сугыш хәрәкәтләре ветераны статусын алган очракта, ТКХ хезмәтләренә 50 процент ташлама бирелә.

Мобилизацияләнгән кешенең яки аларның гаиләләрендә проблемалар яки сораулар барлыкка килсә, район башкарма комитеты җитәкчесенең социаль мәсьәләләр буенча урынбасары Надир Курамшинның 3-03-45 номерлы кабул итү бүлмәсенә мөрәҗәгать итәргә мөмкин. 

— Бездә, бөтен илдәге кебек үк, «Ватанны саклаучылар» фонды эшли, ул Тынычлык проспекты, 13 нче йорттагы район башкарма комитеты бинасында урнашкан. Монда хәрби хәрәкәтләр ветераны таныклыгын рәсмиләштерү соравы белән мөрәҗәгать итәргә мөмкин, — ди Надир Курамшин.

Еш кына район җитәкчелеге белән мондый очрашуларга хәрбиләр гаиләләре, әти-әниләре белән килә. Бу юлы да очрашуда бер көрәшченең әнисе бар иде. Улыбызның ялга кайтуын түземсезлек белән көттек, без бит әти-әни һәм һәрвакыт балаларыбызны көтәбез, дип уртаклашты ул. 

— Бездә әлегә проблемалы сораулар тумады, кураторларга яки район җитәкчелегенә мөрәҗәгать итмәдек, әмма егетләрне менә шулай җыюлары, алар белән җылы итеп аралашулары, аларга җаннарын һәм йөрәкләрен ачулары сөендерә, бу бик мөһим, − ди алабугалы. 

Аның улы сентябрьдә үз теләге белән Ватанны якларга киткән, гаиләсе белән аралашканда беркайчан да авырлыклардан зарланмый, сорауларга һәрвакыт ирләрчә кыска җавап бирә. Кыска гына ялы эчендә ул үзенең сөйгәне белән никахларын рәсмиләштерергә өлгергән. Шушы көннәрдә ул кабат махсус операция урынына китә, ләкин ялың ничек узды дигән сорауга «Иң рәхәте — өйдә» дип җавап бирә.