Алабуга районында быел чәчүлек мәйданы 40 мең гектарга җитәргә тиеш

Халык «Язның бер көне — ел туйдыра» дигән. Бу әйтемгә таянып, Алабуга районы авыл хуҗалыгы товар җитештерүчеләре язгы кыр кампаниясен актив алып баралар, оптималь срокларга сыешырга һәм эшләрнең югары сыйфатын тәэмин итәргә омтылалар.

Агротехнологияләрне төгәл үтәү, минераль ашламаларны һәм яклау чараларын дөрес куллану, шулай ук авыл хуҗалыгы техникасын һәм орлык материалын нәтиҗәле куллану кебек эшләр башкарыла.

Бүгенгә барлык авыл хуҗалыгы предприятиеләре һәм фермер хуҗалыклары чәчүгә керештеләр. Әмма һава торышы да үз төзәтмәләрен кертә: я аномаль эсселек, я салкын һәм кар ява, я кырау төшә.

− Табигатьнең барлык капризларына карамастан, район аграрийлары икеләтә энергия белән эшлиләр һәм билгеләнгән планнарыннан тайпылмыйлар, — дип билгеләп үтте авыл хуҗалыгы һәм азык-төлек идарәсе җитәкчесе Александр Косов.

Чәчүгә планнар һәм аның структурасы
Быел районда чәчүлек мәйданы 40 мең гектарга җитәргә тиеш, бу узган елга караганда 5 мең гектарга күбрәк. Шулардан:
Бөртекле һәм кузаклы культуралар — 19 мең гектар (2023 ел белән чагыштырганда 4,5 мең гектарга күбрәк), шул исәптән: сабан бодае — 11 мең гектар (ике тапкырга күбрәк), көзге бодай — 2822, арпа — 4000, солы — 561, борчак — 300, ашлык кукурузы — 233 гектар.

Майлы культуралар — 4 мең гектардан артык:

• көнбагыш — 2159 гектар («Аммоний» һәм «Вятские зори» хуҗалыклары),
• сабан рапсы — 1576 гектар («Аммоний»),
• горчица — 34 гектар («Вятские зори»).

Азык культуралары — 15,5 мең гектар.

• Бәрәңге — 256 гектар («Вятские зори»).
• Яшелчәләр — 264 гектар («Вятские зори» һәм «Кубайцев» крестьян-фермер хуҗалыгы, биредә көзге сарымсак утырту икеләтә арткан).

Уңышның өч шарты
1. Сыйфатлы орлыклар — районда тәэмин ителеш 100 процент тәшкил итә (3522 тонна), барлык партияләр дә тикшерелгән һәм стандартларга туры килә.
2. Техниканың төзеклеге — барлык тракторлар, чәчкечләр һәм культиваторлар эшкә әзер, кырда һәркөнне 40тан артык агрегат эшли.
3. Ашламалар — 5865 тонна минераль ашлама сатып алынган (гектарга 75 кг, узган ел 71,1 кг булган).

Сатып алулар буенча лидерлар:

• «Вятские зори» — 130 кг/га,
• «Мир» җәмгыяте — 98 кг/га,
• «Аммоний агротехнологии» — 97 кг/га.

Чәчүнең барышы
Көзге культураларны һәм күпьеллык үләннәрне тукландыруга беренчеләрдән булып «Мир» җәмгыяте кереште.

Бүгенгә 5330 гектар (планнан 20 процент) чәчелгән, шул исәптән:

• бөртекле сабан — 3200 гектар,
• силоска кукуруз — 1500 гектар,
• көнбагыш — 130 гектар.

Чәчү темплары буенча лидерлар:

• «Мир» җәмгыяте — 2830 гектар,
• «Аммоний Агротехнологии» — 1100 гектар,
• «Вятские зори» — 375 гектар.

Уҗымнарның торышы
Мониторинг мәгълүматларына караганда, көзге культураларның 95 проценты (2680 гектар) яхшы кышлаган, 5 проценты (142 гектар) канәгатьләнерлек хәлдә. Һәлак булган чәчүлекләр юк.

Алда өч атна интенсив эш көтә.

— Хәзер игенчеләрнең иң җаваплы чоры: игеннәрнең, бәрәңгенең, яшелчәләрнең һәм терлек азыгының киләчәктә уңышы язгы кампаниянең сыйфатлы һәм вакытында башкарылуына бәйле. Димәк, безнең авыл хуҗалыгы җитештерүчеләренең икътисадый иминлеге дә, — дип ассызыклый Александр Косов.

P. S. Татарстан Республикасы Авыл хуҗалыгы һәм азык-төлек министрлыгы Алабуга районының язгы кыр эшләренә әзерлеген 50 баллга бәяләде — бу максималь нәтиҗә!