Алабуга районында язгы чәчүгә кирәкле авыл хуҗалыгы техникасы тулысынча әзер

Эш башлануга, район кырларына 198 трактор, 6 чәчү комплексы, 76 орлык чәчкеч һәм 42 культиватор чыгарылырга тиеш. 

Аграрчылар республика программаларында катнаша. Татарстанда бүген 19 программа тормышка ашырыла, авыл хуҗалыгы җитештерүчеләре аларның һәммәсендә катнаша ала. Аларның күбесе алабугалыларны да кызыксындыра, ләкин 5 процентлы кредит алуда барысы да катнаша дип әйтеп булмый. 

Рөстәм Нуриев «Башак» авыл хуҗалыгы кооперативы җитәкчесе Павел Талапинны һәм «Аммоний» вәкилен әлеге программада катнашу мөмкинлеген карарга чакырды, ник дигәндә, бу чаралар язгы чәчүне үткәрү һәм корылмалар төзүдә артык булмас. Авыл хуҗалыгы һәм азык-төлек идарәсе тиешле документларны хәзерләүдә булышачак.