Алабуга районының Яковлево игенчеләре бөртекле культураларның төп өлешен чәчүне тәмамлады

Икмәкне 15 майда чәчәләр дип, борынгылар әйтә торган булган. Нәкъ менә шул көнгә Яковлево игенчеләре бөртекле культураларның төп өлешен чәчүне тәмамлады.

— Бүген бодай чәчәләр, ул 450 гектар алып торачак. Аның орлыкларын бертуган Тулкын һәм Рәхмәт Муллаевлар томалый, әле һәркайсы бу эшне көненә 60-70 гектарда үти, —дип аныклады «Якты үзән» ҖЧҖ җитәкчесе Фиргат Сәлахов. — Моннан тыш, кукуруз чәчәбез, аның мәйданы быел 220 гектарга кадәр арттырылды. Бу эшне Виктор Щербенев көненә 25-30 гектарда башкара. Механизаторлар көне буе эшли, аларны ике мәртәбә бушлай ашаталар. Чиратта — чәчелгән урыннарны гербицид белән эшкәртү, бу көннәрдә анда гектарына 100 килограмм исәбеннән аммиак селитрасын чыгаралар. 

— Фиргат Исхакович, 400 гектар берьеллык һәм 220 гектар күпьеллык үләннәр дә чәчелгәнен санасак, азык базасын ныгытуга күп көч куелган. Димәк, терлекләрнең баш санын арттырырга җыенасыз?

— Әйе, шуңа омтылабыз. Мөгезле эре терлекләр 1 мең 300гә җитте, атлар — 150, былтыргыга караганда 40ка артык. Бездә ел әйләнәсендә бер төрле тукландыру, кышкы рационнар буенча, шуңа күрә ныклы запас булырга тиеш.