Яңа ел табынына 5 җиңел һәм тәмле салат

Түбәндә язылган салатларның барысы да катлап ясала, һәр кат саен майонезны челтәрләп яки шакмаклап салырга кирәк.

«Җилкән» салаты
Кирәк: ысланган тавык ите, корейча кишер, кукуруз, йомырка, чипсы, майонез.
Әзерләү: ингредиентларны язылган тәртиптә салырга һәм һәр кат саен майонез өстәргә. Чипсыларны вакларга һәм табынга чыгарыр алдыннан гына салатның өстен бизәргә.

«Ананаслы» салат
Кирәк: тәмләткечләр белән кыздырылган тавыкның түше ите, йомырка, каты сыр, консервланган ананас, әстерхан чикләвеге, майонез.
Әзерләү: ингредиентларны язылган тәртиптә салырга һәм һәр катына майонез сыларга, иң өске катта вакланган чикләвек.

«Патшабикә» салаты 
Кирәк: пешкән сыер ите, майда кыздырылган суган, корейча кишер, төшсез караҗимеш, әстерхан чикләвеге, майонез.
Әзерләү: итне, кара җимешне һәм чикләвекне турарга. Аннары һәрбер ингредиентны шул тәртиптә салып, катлап ясарга, кат саен челтәрләп майонез салырга.

«Каенкай» салаты
Кирәк: шампиньон гөмбәсе (маринадланганы да ярый), суган, ысланган тавык түше, караҗимеш, йомырка, яңа кыяр, каты сыр, майонез.
Әзерләү: шампиньонны һәм суганны вак итеп турарга, үсемлек маенда кыздырып алырга. Тавык түшен, караҗимешне һәм кыярны саламлап турарга, сырны угычтан уарга. Ингредиентларны катлап салырга, кат саен майонез. 

«Тиффани» салаты
Кирәк: ысланган тавык түше, әстерхан чикләвеге, каты сыр, виноград.
Әзерләү: тавык итеп шакмаклап турарга, чикләвекне ваграк итеп турарга, сырны эре угычтан уарга, виноградны урталай кисәргә, һәм төшләрен алырга, салатның иң өстенә тезәргә.

Фото ясалма фәһем ярдәмендә ясалды