Галимнәр җәйге эсседә пластик шешәдән су эчүнең зыяны турында сөйләде

Җәйге челләдә пластик шешәдән су эчәргә киңәш ителми! Бөекбритания галимнәре шулай дип кисәтә, дип яза «Ватаным Татарстан» сайты. 

Пластик шешәдәге суда күп кенә химик матдәләр бар, ди алар. Шуңа күрә ул еш кына аш бүлмәсендәге суүткәргечтән акканына караганда да куркынычрак булырга мөмкин икән. Ник дигәндә, пластик җитештергәндә бисфенол-А дигән зарарлы матдә кулланыла.

Әлеге матдә пластик җылынган вакытта, мәсәлән, кояшта торганда бүленә. Мондый суны эчкән һәр кешенең диярлек бәвелендә бисфенол-А барлыгы ачыклана икән. «Бисфенол-А матдәсе калкансыман биз, нәсел калдыру өчен җаваплы булган органнар эшчәнлеген боза. Шулай ук тазаруга, кан басымы күтәрелүгә һәм шикәр чире башлануга сәбәпче була», — дип кисәтә белгечләр.

Фото: freepik.com